МАН-ын дарга Ерөнхий сайд У.Хүрэлсүхээс “Жижиг дунд үйлдвэрийг хөгжүүлэх зээл авсан сайд нараа албан тушаалаас нь чөлөөл, зээл авсан гишүүдээ хуулийн байгууллагаар шалгуул, намын Бага хурлаа яаралтай хуралдуул” гэж шаардсаныхаа төлөө УИХ дахь МАН-ын бүлгийн дарга Д.Хаянхярваа өчигдөр орой бүлгийн даргын ажлаа өглөө.

Түүнийг дээрх шаардлагыг тавьж мэдэгдэл хийсний дараа МАН-ын дарга, Ерөнхий сайд У.Хүрэлсүх МАН-ын бүлгийн дарга Д.Хаянхярваа, Нийслэлийн Засаг дарга бөгөөд Улаанбаатар хотын захирагч С.Батболд нарыг албан тушаалаас нь чөлөөлөхөөр намын Удирдах зөвлөлөө хуралдуулсан билээ. Удирдах зөвлөлийн шийдвэрийн дагуу өчигдөр орой УИХ дахь МАН-ын бүлэг хуралдаж, Д.Хаянхярвааг албан тушаалаас нь чөлөөллөө. Харин нийслэлийн Засаг дарга С.Батболдыг албан тушаалаас нь чөлөөлөх, эсэхийг НИТХ-аар хэлэлцэж шийдвэрлэнэ.

Хэдийгээр МАН-ын дарга У.Хүрэлсүх УИХ дахь намын бүлгийн даргадаа арга хэмжээ авсан боловч түүний тавьсан шаардлагад ямар нэг хариу өгөөгүй байна. Одоогийн байдлаар ХХААХҮ-ийн сайд Б.Батзориг албан тушаал, эрх мэдлээ урвуулан ашиглаж ЖДҮХС-гаас УИХ, Засгийн газрын гишүүдэд их хэмжээний зээлийг хөнгөлөлттэй нөхцлөөр өгснийхөө төлөө албан тушаалаасаа чөлөөлөгдөөд байгаа. Харин ЖДҮХС-гаас зээл авсан Зам тээврийн хөгжлийн сайд Я.Содбаатарын хувь заяа хэрхэх нь одоогоор тодорхойгүй байгаа юм. Ерөнхий сайд У.Хүрэлсүх түүний талаар “Хуулийн байгууллага шалгаад зээл авах явцад ямар нэг хууль нөлөө орсон нь тогтоогдвол хариуцлага тооцно” гэсэн билээ.

Харин Д.Хаянхярваа гишүүний хувьд өөрийг нь МАН-ын бүлгийн даргаас чөлөөлсөн явдлыг тун тайван хүлээж авсан бөгөөд “Би бүлгийн шийдвэрийг дагах ёстой. Шийдвэрийг хүндэтгэж байна, надад гомдол байхгүй. Өнгөрсөн хугацаанд намайг хэрхэн ажилласныг бүлгийн хамт олон дүгнэх байх. Гэвч харамсалтай нь өнөөдөр зарчим ярьж болдоггүй цаг ирчихсэн юм байна. Хүний алдааг оноог ярьж болдоггүй болчихсон байна. Мөн хууль дүрэм хэрэгжихэд хэцүү болсон юм байна гэдгийг л харж байна. Цаашид би өөрийн дуу хоолойгоо хэнээр ч хязгаарлуулахгүй. Ард түмнээс сонгогдсон төрийн түшээ хүн ард түмний талд дуугарах ёстой. Түүнээс биш намын эрх ашиг, бүлэглэлийн эрх ашгийн төлөө дуугарахгүй ёсгүй” гэлээ.