Улсын Ерөнхий прокурор М.Энх-Амгалангаас УИХ-ын дарга М.Энхболдод УИХ-ын гишүүн Б.Батзоригийн бүрэн эрхийг түдгэлзүүлэх хүсэлт хүргүүлсэн билээ. Хуулийн дагуу 48 цагийн дотор энэхүү хүсэлтийг Их хурлын чуулганаар хэлэлцэх ёстой. Энэ дагуу өнөөдөр УИХ-ын чуулган хуралдаж шийдвэрээ гаргалаа. 

УИХ-ын гишүүн Б.Батзоригийн бүрэн эрхийг түдгэлзүүлэх шаардлагагүй гэсэн томъёллоор нууц санал хураалт явуулж 86.8 хувь дэмжлээ.

Ингэснээр ЖДҮХС-гаас зээл авсан хэрэгт холбогдсон УИХ-ын гишүүн Б.Батзоригийн бүрэн эрхийг түдгэлзүүлэх шаардлагагүй гэж УИХ үзлээ.  

Улсын Ерөнхий прокурор М.Энх-Амгалангын Их хурлын чуулган дээр хэлсэн үгнээс: 

Цаад талын үндэс суурийг өөрчлөх нь миний асуудал биш. Та нарын асуудал. Яагаад шалгадаггүй юм, дуугүй өнгөрдөг юм гэж байна. Бүгдэд нь, бүх хэрэгт хэрэг бүртгэл нээгээд шалгаж байгаа. Та нарын хуулиас үүдэж барьж, шалгаж болохгүй байна. Та нарын баталсан хуулиас үүдэж ийм асуудал байхад биднийг буруутгаж болохгүй. Та нар дандаа ингэх юм, Хууль сайд ажлаа хийхгүй байна гэж. Хууль зүйн сайд мэддэггүй юм. Хууль зүйн сайд хэрэг бүртгэх мөрдөн байцаалтад ямар ч хамаагүй. 

Хаана байгаа юм шударга ёс чинь. Жирийн иргэн нь цагдан хоригдчихсон байна. Шийдвэр гаргасан хүн нь зүгээр сууж байна. Хэрэгжүүлсэн нь хоригдож байна. Мөс хайлуулах нь миний асуудал биш ээ. Хууль мөрдүүлэх нь миний ажил.