БНСУ-ын Сөүл хотоос гурван сарын хугацаатай томилогдон ирсэн 40 сайн дурын ажилтан нутаг буцахаасаа өмнө ажлаа дүгнэж, танилцууллаа. 

Солонгосын сайн дурын багийнхан 2023 оны арванхоёрдугаар сард Монголд ирсэн. Тэд уур амьсгалын өөрчлөлт болон дэлхийн иргэний боловсрол сэдвийн хүрээнд оюутан, сурагчдад сургалт орж, хүүхэд хамгааллын чиглэлээр "Ид шидийн орон"-д ажиллажээ. 

Өчигдөр "Holiday Inn" зочид буудалд болсон сайн дурын багийнхны үр дүнгийн хэлэлцүүлгийн үеэр сайн дурын гишүүн У Сон Бинтэй ikon.mn ярилцсаныг уншигчиддаа хүргэж байна. У Сон Биний монгол нэрийг Уянга гэдэг. 

-Сайн байна уу. Таны хувьд Монголыг сонгож, сайн дурын гишүүнээр элсэх болсон шалтгаан юу вэ? 

-Өмнө нь би Монгол Улсыг зөвхөн аялал жуулчлалын газар гэж бодож явсан. Ердөө аялахын тулд солонгосчууд олноор зорин ирдэг. Харин миний хувьд аялахаас илүү Монгол Улсад яаж тусалж болох вэ, надад тус болж чадах зүйлс байгаа билүү гэж боддог байсан. Сөүл хотын захиргаанаас сайн дурын хөтөлбөр зарлах үед материалаа явуулж, ярилцлага өгч тэнцээд ирсэн. 

-Өөрөө очиж бүртгүүлээд Монгол руу явахаар шийдсэн гэж ойлголоо. Гурван сар гэдэг тийм ч богино хугацаа биш байх. Гэр бүлийнх нь зүгээс шийдвэрийг нь хэрхэн хүлээж авсан бэ? 

-Монгол орон бол манай гэр бүлийнхний ирж үзэхийг хүсдэг, маш сонирхолтой улс. Монгол руу сайн дурын ажлаар явахаар болсноо гэрийнхэндээ хэлэхэд баяр хүргээд маш их дэмжсэн.

Заримдаа “Би Солонгост байгаа билүү, Монголд байгаа билүү” гэж бодож байсан

-Монголд ирсэн анхны сэтгэгдэл, мөн гурван сарын хугацаанд Монголд байх үеийн сэтгэгдэл ямар байсан бэ?

-Хамгийн анх Монголд ирэхэд маш хүйтэн байсан. Монгол, солонгос хүмүүсийн хооронд нэг их ялгаа байгаагүй. Заримдаа “Би Солонгост байгаа билүү, Монголд байгаа билүү” гэж их бодож байлаа. Гурван сарын хугацаанд монголчуудтай хамт байхад үнэхээр өөртөө итгэлтэй, "Би үнэ цэнтэй хүн" гэдгээ мэдэрсэн хүмүүс байсан нь анзаарагдсан. 

Солонгосчуудын хувьд бусдын аясыг их дагадаг. Жишээлбэл дарга нь нэг том харангуут бүлтгэнээд л яваад байдаг. Монголчуудад тийм зан байхгүй, үзэл бодолдоо үнэнч, өөртөө итгэлтэй байдал нь таалагдсан. Тэр чанарыг нь сурмаар байна. 

-Таны хувьд Монголд байх хугацаандаа сайн дурын ямар ажлууд хийсэн бэ?

-Монголын Үндэсний Их Сургууль (МҮИС)-д хуваарилагдан ажилласан. Томилогдон ажиллах хугацаандаа МҮИС-ийн оюутнуудад хог хаягдлыг хэрхэн ангилж хаях ёстой, ангилан ялгаж хаяхын ач холбогдол зэргийг зааж, сургалт орлоо. Мөн хамтран ажиллах хугацаандаа солонгос хэл зааж, Солонгосыг соёлыг танилцуулсан. 

Чингэлтэй дүүргийн дөрвөн сургуульд очиж, тавдугаар ангийн сурагчдад уур амьсгалын сэдвээр хичээл орсон. Хог хаягдлаа ялгахдаа дөрөв ангилах хэрэгтэй байдаг. 

• Энгийн 
• Дахин боловсруулах
• Хоол хүнсний
• Электрон бараа бүтээгдэхүүний хог хаягдал гэж ангилан хаяхыг тавдугаар ангийн хүүхдүүдэд зааж, хичээл сонирхолтой үргэлжилсэн. 

-Хог хаягдлыг бид яагаад ангилан ялгах ёстой, үүний ач холбогдол нь юу вэ?

-Дэлхий өөрийн гэсэн даац хэмжээтэй. Тэр даац хэмжээ нь хязгаартай. Хэрэв хэрэглээ болгоноо хог болгож хаяад явбал даац хэтэрч, эцэст нь бид дэлхий дээр амьдрах зайгүй болно. Ийм учраас эх дэлхийгээ хайрлаад хогоо ангилж хаях хэрэгтэй. Хогоо хаяхаасаа өмнө “Би үүнийг дахин хэрэглэж болох уу, үгүй юу” гэдгийг тунгаан бодох нь чухал. Хүн төрөлхтөн гэдэг дэлхий, байгаль ертөнц дээр түр амьдраад л буцаж байгаа гэж хувьдаа боддог. Ингэж түр хугацаанд амьдарч байх хугацаандаа байгалийг бусниулах ямар ч эрхгүй.

"Монголчууд маань цэвэр агаарт амьдардаг болоосой гэж хүсэж байна"

-Таны ажигласнаар Улаанбаатар хотод ямар асуудал тулгамдаж байгааг анзаарсан бэ?

-Хэлээд өгчихвөл монголчууд хог хаягдлаа өөрсдөө ялгаж чадна. Хамгийн гол нь ялгаж ангилсан хог хаягдал нь эцсийн цэгтээ очоод нэг газар холилдоод хаягддаг юм байна. Тийм болохоор энэ чиглэлд улсаас шийдвэр гаргах хэрэгтэй байх. Хувь хүн, иргэд хог хаягдлаа ялгаад очиход нь тэдгээрийг боловсруулах боломжтой болгочихвол үүнээс үүдэх асуудал буурна. 

Түүнчлэн Улаанбаатар хотод Монголын дийлэнх хүн ам нь бөөндөө амьдарч байна. Гэтэл агаар нь үнэхээр муу байсан. Монголчууд маань цэвэр агаарт амьдардаг болоосой гэж хүсэж байна.

-Энэ хугацаанд мөн хүүхэд хамгааллын чиглэлээр "Ид шидийн орон"-д ажилласан гэсэн үү?

-Тийм ээ. Гэхдээ би сайн дурын ажил хийж байгаа биш. Харин хүүхдүүд надад хичээл орж байгаа мэт л санагдсан. Энэ хэмжээгээр монгол хүүхдүүдээс маш их зүйл суралцлаа. 

Хүүхдүүд надад бэлэг өгсөн. Хэдийгээр гаднаас нь харахад жижигхэн харагдаж байгаа ч тэд өөртөө байх хамгийн үнэ цэнтэй, гоёмсог бэлгийг надад бэлдсэн. Монгол хүүхдүүдийн тэр их хайр энэрэл дотор үнэхээр сайхан байлаа. 

"Агаарын бохирдлыг бууруулах чиглэлд сайн дурын ажил болбол хичээлээ хийж, бэлдэж байгаад Монголд ирнэ"

-Хамт томилогдон ирсэн сайн дурын багийнхны сэтгэгдэл ямар байна вэ? 

-Бидэнд хүмүүсийн сайхан сэтгэл үргэлжилж мэдрэгдэж байсан. Бүх зүйлээ орхиод ч хамаагүй энэ хүүхдүүдтэй амьдрахын тулд Монголд ирж магадгүй гэж ярьж байсан хүн ч бий. 

-Улаанбаатарын утааны асуудлыг та дээр дурдлаа. Магадгүй энэ чиглэлээр сайн дурын ажил зохион байгуулагдвал та Монголд дахин ирэх үү? 

-Монгол Улс надад маш их таалагддаг. Буцаж яваад дахиад ирэх ямар нэгэн боломж байвал заавал ирнэ. Хэрвээ агаарын бохирдлыг бууруулах талаарх сайн дурын ажил болбол надад мэдлэг байхгүй байсан ч хичээлээ хийж, бэлдэж байгаад Монголд ирнэ.

-Ярилцлага өгсөнд баярлалаа.

iKon.mn