УИХ-ын гишүүд, сайд нарт ЖДҮДС-ийн зээлээр бэлэн барьсан ХХААХҮ-ийн сайд Б.Батзориг ажлаа өгөхөөр болов. Мөн өнөөдөр түүнийг УИХ-ын гишүүнээс түдгэлзүүлэх асуудлыг хэлэлцэнэ. Түүнийг албан тушаалын бүрэн эрхээ урвуулан ашиглаж өөртөө болон бусдад давуу байдал олж авсан хэрэгт буруутгаж, прокуророос УИХ-ын гишүүний бүрэн эрхийг нь түдгэлзүүлэх асуудлыг тавиад байгаа. Энэ асуудлыг өнөөдөр УИХ-ын нэгдсэн чуулганаар хэлэлцэн шийдвэрлэнэ.

Гэвч түүний ард ЖДҮДС-аас зээл авсан нэр бүхий арав гаруй УИХ-ын гишүүн, сайд нарын асуудал үлдээд байна. МАН-ын дарга тэдэнд “Авсан зээлээ эргүүлж төл” гэдэг шаардлагыг тавьсан. Эхнээсээ зээлээ төлөөд эхэлчихлээ. УИХ-ын гишүүн Х.Учрал, Ж.Энхбаяр нар “баатарлагаар” зээлээ эргүүлэн төлсөн тухайд хэвлэл мэдээллийр бахархалтайгаар бичиж байна. Мөнгөтэй ч улс юм. (тийм байж яах гэж эхнээсээ ийм зүйлд орооцолдсоныг таах ухаан хайрла) Зарим нэг нь ЖДҮ-ээс зээл авсныхаа төлөө иргэдээсээ уучлал гуйсан ч гэнэ. Уг нь зээл авахаасаа өмнө энэ тухай бодох ёстой байв. Энэ хэнд зориулагдсан мөнгө билээ гэж.

Харин УИХ-ын гишүүн Х.Болорчулуун шууд “Би уучлал гуйхгүй, уучлал гуйх зүйл хийгээгүй” гэв. Х.Оюундарь гишүүн ч бас “Миний хүү энэ зээлийг авах гэж хоёр гурван жил ЖДҮДС-д хүсэлт гаргасан. Тодорхой шалгуурыг хангасан учраас зээл өгсөн. Ямар сайхан зүйл хийж болддгийг ард түмэндээ хариуулах гэсэн юм. Юм хийснийхээ төлөө уучлал гуйх ёстой юу” гэж уурлав. Г.Солтан гишүүн “Би компанийнхаа ажилд оролцолгүй удаж байгаа учраас энэ зээл надад хамаагүй” гэлээ. Ерөнхийдөө нэг иймэрхүү. Ихэнх нь “Бид хуулийн дагуу зээл авсан учраас буруугүй” гэж үзэж байна. Тэгээд ч одоо мөрдөж байгаа Эрүүгийн хуулиар эдгээр нөхдөд хариуцлага тооцох боломж байхгүй. Тэр нь ч гэсэн манай нөхдийг “Сүүлээ сэрвээн дээрээ хаях” боломжийг олгож байгаа бололтой. Зээл өгсөн нь буруу юм бол авсан нь зөвдөх ёс байх уу?

Зээл авсан сайдыг бол мэдээж “улс төрийн хариуцлага” яриад албан тушаалаас нь чөлөөлж болно. Харин УИХ-ын гишүүдийг яах вэ? УИХ-ын гишүүнээс нь чөлөөлөх үү? Хуулийн хувьд ийм боломж байхгүй гэдгийг өмнө хэлсэн. Харин улс төрийн хариуцлага нь ямар байх бол. УИХ-ын гишүүнээс нь эргүүлэн татъя гэхэд нөхөд “бид гэмт хэрэг хийгээгүй” гэж зүтгэнэ, УИХ-ын бусад гишүүд ч тэгж үзнэ. Чоно үүрэндээ өлзийтэй гэж үг бий. Тэгээд ч энэ удаагийн сонгууль жижиг мажоритари системээр явагдсан учраас тойргоос сонгогдсон гишүүнийг намын дарга санаачлагаараа эргүүлэн татах боломжгүй. Хэрэв хуучин шиг намын жагсаалтаар гарсан бол эргүүлж татаад арынх нь хүнийг оруулаад ирэх боломж байв.

Гэвч ямар ч үед гарц олддог гэдэг дээ. УИХ-ын гишүүнээс нь эргүүлэн татах болмжгүй юм бол ядаж л “Албан тушаалын нөлөөгөө (эрх мэдэл биш шүү, хуулийн хувьд тэгж үзэх боломжгүй) ашиглан төсвийн мөнгө рүү гар дүрсэн, ашиг сонирхлын зөрчил гаргасан эдгээр нөхлийг 2020 оны сонгуулиар МАН нэр дэвшүүлэхгүй” гээд л зарлачих хэрэгтэй юм. Энэ л улс төрийн хариуцлага. МАН-ын даргын хувьд хийж чадах зүйл энэ.

Тэгвэл ядаж л дараа дараачийн УИХ-ын гишүүдэд сургамж болно. Түүний яриад байгаа хариуцлагатай, ёс зүйтэй, шударга төр бий болно. Хэрэв түүний УИХ-ын индэр дээрээс хэлсэн ““Ард түмний өмчийг төрийн хулгайчдаас амиараа хамгаална” гэсэн үг үнэн бол ядаж үүнийг хийх ёстой. Заавал хэн нэгэнтэй байлдаж, амиа өргөх ямар хэрэгтэй юм.

Б.СЭМҮҮН