Улсын ерөнхий прокурор М.Энх-Амгалан УИХ-ын гишүүн, Хүнс, хөдөө аж ахуй, хөнгөн үйлдвэрийн сайд Б.Батзоригийг парламентын гишүүний бүрэн эрхийг түдгэлзүүлэх тухай албан бичгийг өнөөдөр /2018.11.05/ УИХ-ын дарга М.Энхболдод өгчээ. Прокуророос ирсэн бичгийг УИХ 48 цагийн дотор шийдвэрлэх ёстой. МАН-ын бүлэг үдээс хойш уг асуудлаар хуралдахаар болжээ.

УИХ-ын нэр бүхий гишүүд болон түүний хамааралтай компани Жижиг, дунд үйлдвэрийг хөгжүүлэх сангаас (ЖДҮХС)  хөнгөлөлттэй зээл авсан талаар мэдээлэл цацагдаж нэлээдгүй асуудал дагуулаад байгаа. Тодруулбал, УИХ-ын гишүүн Х.Болорчулуун, Г.Солтан, ХХААХҮ-ийн сайд Б.Батзориг, УИХ-ын гишүүн Н.Учрал, А.Сүхбат, Н.Оюундарь, Ж.Энхбаяр нар өөрийн болон хамаарал бүхий хүмүүсийн эзэмшдэг компаниуд  Жижиг, дунд үйлдвэрийг хөгжүүлэх сангаас (ЖДҮХС) зээл авсан нь ил болоод байгаа юм. Үүнтэй холбогдуулан ХХААХҮ-ийн сайд Б.Батзориг “Хариуцлагаа хүлээж, сайдын албан тушаалаа өгнө” гэж мэдэгдсэн билээ. Мөн  АТГ-аас ЖДҮХС-гийн захирал Ж.Төгсбилэг тэргүүтэй дөрвөн албан тушаалтанг саатуулан шалгаж, мөрдөн шалгах ажиллагаа явуулж байгаа юм.

Тэгэхээр Б.Батзоригийн бүрэн эрхийг түдгэлзүүлэх эсэх асуудлыг Хууль зүйн байнгын хороодын болон Улсын Их Хурлын гишүүний халдашгүй байдлын дэд хорооны санал, дүгнэлтийг үндэслэн хэлэлцэж хуралдаанд оролцсон гишүүдийн олонхийн саналаар шийдвэрлэх ёстой юм.