УИХ дахь Ардчилсан намын бүлэг өнөөдөр мэдээлэл хийж, Жижиг дунд үйлдвэрлэлийг /ЖДҮ/ дэмжих сангаас олгосон нэн хөнгөлөлттэй зээлийн олголтыг “ашиг сонирхлыг зөрчилтэй” гэв. Мөн энэ асуудлын мөрөөр зохих арга хэмжээ авахыг УИХ-ын дарга М.Энхболд, Ерөнхий сайд У.Хүрэлсүх нараас хүсч, шаардлага хүргүүлсэн байна.

Д.Эрдэнэбат /УИХ дахь Ардчилсан намын бүлгийн дарга:

-ЖДҮ-ийг дэмжих сангийн хуваарилалт ямар ч шалгуургүйгээр эрх мэдэлтэйд нь олгох байдал хавтгайрсан. Үүний тод жишээ бол олон нийтэд цацагдаж байгаа мэдээлэл юм. Тиймээс нэн даруй таслан зогсоох шаардлага үүсээд байна. Ялангуяа ашиг сонирхлын зөрчил гарч байгаа ЖДҮ зорилгоосоо гажуудсан үйл ажиллагаа явуулсан гэдэг нь харагдаж байна. Хуулийн дагуу, арилжааны банкны шалгуурыг хангасан ЖДҮ-т зээл олгох байтал сайдын тушаалаар зээлүүдийг олгосон. МАН-ын нэр бүхий олон гишүүн энэ асуудалд холбогдож байгаа. МАН-ын нэг гишүүн  дунджаар 950 сая төгрөгийн зээлийг авсан байна.

С.Эрдэнэ /Ардчилсан намын дарга, УИХ-ын гишүүн/:

-Ардчилсан намын Улс төрийн зөвлөл хуралдаад байр сууриа илэрхийлэх нь зүйтэй гэж үзсэн. Сүүлийн үед ноцтой зөрчил хэвийн үзэгдэл болох тийшээ хандаж байна. Өнөөдөр хэн дуртай нь шатахууны үнийг нэмж, ам.долларын ханш улам бүр гаарч байна. Бүтээн байгуулалт, хөрөнгө оруулалт хийгдэхгүй байна. Өнгөрсөн оны хөрөнгө оруулалтаас дөнгөж 30 хувийг хийсэн. Тиймээс Ардчилсан нам улс төрийн сөрөг хүчний хувьд идэвхтэй үйл ажиллагаанд шилжих шаардлага үүссэн гэж үзсэн. Эрх баригчид валютын ханш, шатахууны үнийг тогтвортой байлгахын төлөө юу хийснийг бид тодруулах болно. Ханшийн өсөлтийн нөлөөгөөр хэрэглээний бараа бүтээгдэхүүний үнэ өсч байна. Цалин тэтгэвэр нэмж байгаа мэт харагдаж байвч бодит орлого буурсан. Өнөөдөр дундаж цалин 100 гаруй ам.доллараар буурчээ. Улс орны эдийн засгийн бодлого уналтад орлоо. Бид тэвчиж, дуугүй суух боломжгүй боллоо. ЖДҮ-ийг дэмжих сангаас зээл авсан хэдэн гишүүний нэр ил гарч байгаа ч,  МАН-ын 40, 50 гишүүн зээл авсан байж магадгүй байна. Төсвөөс янз бүрийн хэлбэрээр зээл авдаг, тендер завшдаг, гүйцэтгэл байхгүй мөнгө угаасан хэргүүдийг бид ил гаргах болно. Цагдаа тагнуулд өгөх болно. Аудитын байгууллага сул ажиллаж байна. Ерөнхий аудитор өөрөө олон зуун сая төгрөгийн зээл авсан байх жишээтэй. Ийм байхад мөнгө санхүүгийн асуудалд хэн хяналт тавих вэ.

Бид хэдэн хүний мууг үзэх гээд байгаа юм биш. ЖДҮ-ийг дэмжих сангийн бүх орлого, зарлагыг  ил гаргах ёстой. Энэ санд олгосон 200 тэрбум төгрөг бол татвар төлөгчдийн мөнгө юм гэв.

Уг мэдээллийн дараа тэд сэтгүүлчдийн асуултад хариуллаа.

-ЖДҮ-ийг дэмжих сангаас Ардчилсан намынхан ч зээл авсан гэдэг мэдээлэл байна. Энэ үнэн үү?

-Бид нотлох баримттай ярина. Ардчилсан намынхнаас хэн, хэн хэдэн төгрөгийн зээл авч байсныг гаргаад ир. Хуулийн дагуу, зохих шалгуурыг нь хангаад, иргэн хүнийхээ хувьд авсан уу эсвэл эрх мэдэл албан тушаалаар далайлгаж авсан уу гэдэг нь чухал. Жирийн иргэн энэ сангаас зээл авах гэж хэдэн жил хөөцөлдөж байна. ЖДҮ-ийг дэмжих сан бол хэн нэгэн эрх мэдэлтнийг баяжуулдаг сан биш. МАН-ынхан олон жил Ардчилсан намыг мууллаа. Одоо болно шүү дээ. Өнөөдөр Монгол Улсын гадаад өр нэг ч төгрөгөөр буураагүй Ардчилсан нам засаглаж байхад гадаад өрийн хэмжээ 24 тэрбум ам.доллар байсан бол одоо 27 тэрбум ам.доллар болсон. Бидний үед Засгийн газрын өр дөрвөн тэрбум ам.доллартай тэнцэж байсан бол өнөөдөр долоон тэрбум ам.доллар болсон. Дээр нь төсвийн өр нийлбэр дүнгээр долоон их наяд төгрөг болоод байна. Дотоод өр дарагдсан гэж байгаа ч төсвийн алдагдал нэрээр хэдэн их наяд төгрөгийн алдагдалтай төсөв баталж байна.