Францын ерөнхийлөгч Эммануэль Макрон Монгол улсад төрийн айлчлал хийгээд нутаг буцсан билээ. Ням гаригт түүнийг “Чингис хаан” нисэх онгоцны буудлаас Сүхбаатарын талбайд ирэхэд ерөнхийлөгч У.Хүрэлсүх хүлээн авсан бөгөөд бага насны эрэгтэй, эмэгтэй хоёр хүүхэд угтаж цэцэг өргөсөн юм.

Тэгвэл тэрхүү хоёр хүүхдийн нэг болох Б.Эгшиг охин франц хэлтэй төдийгүй франц хэлтэй гэр бүлд өсөж хүмүүжсэн хүүхэд ажээ. Б.Эгшигийн аав Д.Батцогт нь Говь-Алтай аймгийн Төгрөг сумын уугуул боловч Төв аймагт 10 жилийн сургуулиа төгсөөд МУИС-ийн ОУХДС-ийн Франц хэлний ангид элсэн 1997 онд онц дүнтэй дүүргэсэн юм. Их сургуулиа дүүргээд жуулчны компани байгуулж, өнгөрсөн 20 гаруй жилийн хугацаанд Франц улсаас олон зуун жуулчин хүлээн авч Монголтой танилцуулсан, энэ салбарын нэр хүндтэй мэргэжилтэн ажээ. Түүгээр барахгүй МУИС төгссөнөөсөө нэлээд хэдэн жилийн дараа АШУҮИС-д суралцан хүний их эмчийн мэргэжил эзэмшсэн бөгөөд Франц улсад гэр бүлийн хамтаар энэ мэргэжлээрээ ажиллаж байх үед Эгшиг охины мэндэлсэн түүхтэй.

Франц улс, франц хэлтэй холбоотой тэдний түүх үүгээр дуусахгүй нь сонирхолтой бөгөөд Б.Эгшиг охины авга ах буюу аавынх нь төрсөн дүү мөн франц хэлний дээд мэргэжилтэй, эдүгээ Монгол-Францын хамтарсан “Бадрах энержи” компанид арван хэд дэх жилдээ ажиллаж байна.

Тэгвэл охины ээж С.Золзаяа англи хэлний мэргэжилтэй, Шведийн “Epiroc” компанийн Монгол дахь салбарт ажилладаг, англи хэлнээс гадна мөн франц хэлтэй. Эдүгээ 7 настай Б.Эгшиг охин Хан-Уул дүүрэг дэх Франц сургуульд дүүгийн хамтаар суралцдаг байна. Францын Боловсролын яамны харьяа энэ сургуульд Б.Эгшиг дөрөв дэх жилдээ суралцаж байгаа аж.

Эммануэл Макронд цэцэг барих хоёр хүүхдийг Улаанбаатар хот дахь Францын ЭСЯ-ны ажилтнууд айлчлал болохоос арваад хоногийн өмнө энэ сургуулиас сонгосон байна. Сонирхолтой нь, Б.Эгшиг охины аав шалгаруулалтын үр дүнгийн талаар Булган аймгийн Хутаг-Өндөр суманд явж байхдаа сонсчээ. Ам бүл дөрвүүл тэднийх энэ зунаас эхлэн хөдөө орон нутагт буюу тус суманд суурьшин амьдрахаар төвхнөж байгаа ажээ.

Сонгогдсон хоёр хүүхдийн нөгөө хүүхдийн талаар бидэнд тодорхой мэдээлэл үгүй бөгөөд “Таван Богд” группийн ерөнхийлөгч Ц.Баатарсайханы ач хүү байж магадгүй талаар эх сурвалж хэлсэн юм.