2022 оны зургаадугаар сарын 15-ны буюу өнөөдрийн байдлаар Туул голын дунд хэсэг, Орхон голын адгаар, Хэнтий нурууны арын Онон, Хангайн нурууны өврийн Буянт, Алтай нуруунаас эхтэй Буянт, Чигэртэй зэрэг голуудын усны түвшин өмнөх өдрийнхөөс 10-20 сантиметрээр нэмэгдсэн байна.
Харин Хархираа, Онон, Улз, Хэрлэн зэрэг голууд үерийн түвшнийг 5-55 см давсан бол Балж гол Дадал сум орчмоор үерийн аюултай түвшнийг 25 см даван үерлэжээ.
Маргааш Хэрлэн гол Өндөрхаан сум орчмоор, Онон гол Дадал сум орчмоор усны түвшин 10-50 см нэмэгдэх төлөвтэй байна.
Цаг уурын байгууллагаас өгсөн мэдээллээр ойрын өдрүүдэд ихэнх нутгаар дуу цахилгаантай аадар бороо орно.
Иймээс хур борооны эрчимшил хэмжээнээс шалтгаалан гол мөрөн богино хугацаанд үерлэх, жижиг голууд болон хуурай сайраар уруйн үер буух нөхцөл бүрдэх тул дээр дурдсан голуудын сав дагуу суурьшиж, нутаглаж буй ард иргэдийг үерийн аюулаас болгоомжтой байхыг онцгойлон анхаарууллаа.
