Олон улсын дунд сургуулийн сурагчдын гэрэл зургийн тэмцээнд монгол хүүхдүүд тэргүүлжээ
Олон улсын дунд сургуулийн сурагчдын гэрэл зургийн "HIGASHIKAWA Youth Fest"-д монгол сурагчид тэргүүн байр эзэлжээ.
Тодруулбал, Хоккайдо мужийн Хигашикава хотноо долоо дахь жилдээ зохион байгуулагдсан тус тэмцээнд Баян-Өлгий аймгийн Дарын цогцолбор сургуулийн сурагчид болох Аманкел Ерханат, Хайнар Ахжол, Бакыт Алирахман нарын "Холбоос", "Миний хүсэл мөрөөдөл" сэдвийн цуврал бүтээл тэргүүн байр эзэлсэн байна.
Эцсийн шалгаруулалтад БНХАУ, Солонгос, Тайланд, Вьетнам, Узбекистан, Индонези, Австрали, Канад, Латви, Сингапур, Финланд, Монгол, ОХУ, Франц, Лаос, Люксембург, Колумби, Япон зэрэг 18 орны сурагчдын гэрэл зургийн бүтээл орж, манай улсын сурагчид ийн тэргүүн байр эзэлжээ.
Энэ талаар Соёлын сайд Ч.Номин өөрийн цахим хуудсаараа мэдээлсэн байна.
Тэрээр "Өнөөдөр өглөө Япон улсаас баярт шуудан хүлээн авлаа. Энэ жил "Холбоос" гэсэн сэдвээр гэрэл зургийн уралдаан болж манай улсын сурагчдын бүтээл шилдгээр шалгарсан тухай мэдээ, мөн шилдэг бүтээлийн эмхэтгэлийн хамт шуудангаар ирлээ. Удахгүй шагналыг нь хүргүүлнэ ээ. Халуун баяр хүргэе" гэжээ.