Тэвчээр тасарлаа хөдөлгөөний зохицуулагч, иргэн Д.Амартүвшин өдөр бүр төв талбай дээр очиж хуулийн тэгш үйлчлэлийг шаардаж байгаа билээ. Тэрээр эрх баригчид өөрсдийн баталсан хуулиа өөрсдөө зөрчиж, шаардлага тависан иргэдийг хорих анги руу зөөж байгааг эсэргүүцэж байгаа юм. Иргэдийн зүгээс үг хэлэх, үзэл бодлоо илэрхийлэх эрх чөлөөнд халдаж байгааг хурцаар шүүмжилж, дарга нарт өөр, иргэдэд өөрөөр үйлчилж байгаа ковидын хуулийг цуцлахыг шаардаж байна. Мөн ковидын үеийн хуулийг зөрчсөн дарга нарт хариуцлага тооцохыг шаардсаар байна.
Тэгвэл өнөөдөр нүүрс тээврийн жолооч нар төв талбай дээр суулт зарлаж, Ерөнхий сайд Л.Оюун-Эрдэнэд шаардлага хүргүүлээд байна. Эдгээр иргэд 14:00 цагаас өмнө хариу шаардлагад хариу ирүүлэхгүй бол тэмцлийн хурц хэлбэрт шилжилнэ гэдгээ мэдэгдлээ. Энэ үед Сүхбаатарын талбай руу нүүрс тээврийн автомашинтай очсон иргэнийг цагдаагийн байгууллагаас баривчлаад байна.
Энэ талаар иргэн Д.Амартүвшин өөрийн цахим хуудсаараа дамжуулан "Иргэдийн тэвчээрүүд тасраад эхэлж байна. Олон сарын турш Замын-Үүд дээр гацсан жолооч нар өнөөдөр талбай дээр хүрээд ирлээ. Төр засаг хийх ёстой, хийнэ гэсэн ажлаа хийгээгүй байна. УИХ-ын гишүүд Засгийн газартаа хариуцлага тооцож чадахгүй бол өөрсдөө тарцгаа. Дэлхийн зах зээл дээр нүүрсний үнэ 400 ам.доллар хүрчээд байна. Гэтэл манай улс нүүрсээ гаргаж чадахгүй байна. Нүүрс тээвэр хийх ёстой жолооч нар нь хотод машинтайгаа орж ирээд, жагсаж байна.
Монгол Ардын нам Сингапур, Хонг Конг шиг хөгжүүлэх хэмжээнд сонгогдлоо. Юу ч хийж чадахгүй байна. Та нар ажлаа хийж чадахгүй байна гэж хэлсэн залуусыг баривчлаад аваад явчлаа. Л.Оюун-Эрдэнэ албан тушаалтайгаа үлдэхийн тулд монголын ард түмнээр туг тахиж байна. Замын-Үүдийн асуудлыг одоо болтол шийдээгүй байна шүү дээ. Энэ Засгийн газар ажлаа хийж чадахгүй байна. Сошилаар нэг шоудсан хүн. Ганц Замын-Үүдийн асуудлыг шийдэж чадахгүй байна шүү дээ.
Монгол Ардын нам мөнгөөр яаж сонгууль хийдгийг харлаа. Олонхи болоод ч ажил чаддаггүй гэдгийг ч харлаа. УИХ энэ ажлаа хийж чаддаггүй, хууль дүрмээ зөрчдөг энэ хүмүүстээ хариуцлага тооцож чадахгүй бол өөрсдөө тар" гэлээ.
