Оросын эрдэмтдийн бүтээсэн коронавирусийн эсрэг "Спутник V" вакциныг Монгол Улсын Эрүүл мэндийн яам бүртгэлээ хэмээн ОХУ-ын шууд хөрөнгө оруулалтын санг иш татан РИА Новости мэдээллээ.
Тус сангаас гаргасан мэдэгдэлд “Монголын Эрүүл мэндийн яам коронавирусийн халдварын эсрэг "Спутник V" вакциныг бүртгэсэн тухай Оросын шууд хөрөнгө оруулалтын сан мэдэгдэж байна. Бүртгэлийг тус улсад эмнэлзүйн нэмэлт туршилт явуулахгүйгээр онцгой байдлын үед ашиглах журмаар гаргасан” гэж дурджээ.
Вакцины зөвшөөрлийг Оросын шууд хөрөнгө оруулалтын сан Монголын тэргүүлэх эм үйлдвэрлэгч Монгол Эмимпекс Концерн ХХК-ийн туслалцаатайгаар авсан болохыг эх сурвалж мэдээлсэн байна.
Дашрамд, Хоёрдугаар сарын 4-нд Шадар сайд С.Амарсайхан ОХУ-аас Монгол улсад суугаа Элчин сайд И.К.Азизовыг Төрийн ордонд хүлээн авч уулзсан. Энэ үеэр ОХУ-ын Элчин сайд И.К.Азизов "Спутник V" вакциныг цаашид Монгол Улсын зорилтот бүлгүүдэд болон нийт хүн амд нийлүүлэх асуудлаар цаашид үргэлжлүүлэн ажил хэргийн хэлэлцээ хийнэ гэж найдаж буйгаа илэрхийлж байсан билээ.
Эх сурвалж: РИА Новости
