Ням гаригт Гималайн мөсөн гол хагарч Энэтхэгийн хойд хэсэгт орших Уттаракханд мужид гэнэтийн их хэмжээний үер болж, хоёр даланг нураажээ.
Аврах багийнхан тосгонуудыг нүүлгэн шилжүүлэхээр чармайж, 100 гаруй хүний амийг аврахаар ажиллаж байна.
Уттаракхандын удирдагч Тривендра Сингх Рават хэлэхдээ, долоон хүний цогцсыг гаргаж авсан, одоо 125 орчим хүнийг хайж байна. Тэдний ихэнх нь усан цахилгаан станцыг сэргээх хоёр төслийн ажилчид байсан" гэлээ.
"Цасан нуранги ирж, Ришиганга дахь цахилгаан станцын төслийг бүрэн эвдсэн бөгөөд тэндхийн бараг бүх ажилчид сураггүй алга болсон" гэж Уттаракханд мужийн цагдаагийн газрын дарга Ашок Кумар хэллээ.
Тэрээр "Ус урсгалаас доош буух үед бид хүмүүст сэрэмжлүүлэг өгсөн байсан" гэлээ.
Энэхүү үзэгдэл 2013 онд Уттаракханд үер буусныг санагдуулж байсан бөгөөд хэдэн өдрийн турш ширүүн бороо орсны улмаас хөрсний нуралт болж олон мянган хүний амь үрэгдэж, бүхэл бүтэн тосгон тэр чигтээ сүйрч байжээ.
Өвлийн дунд сард мөсөн гол хагарсан нь цаг уурын өөрчлөлтийн үр дагавар болсон гэж үзсэн эрдэмтэд агаарын хэм өсч байгаа нь Гималайн мөсөн голыг аймшигтай хурдаар хайлуулж байгааг анхааруулж байна.
Олон арван сая хүнийг усаар хангадаг мөсөн голууд зууны эцсээр ихэнх нь устаж үгүй болох магадлалтай байгааг саяхны судалгаагаар тогтоогджээ.
Б.Бүжлхамаа
www.nytimes.com
