Трампын засаг захиргаа Обамагийн үеэс яригдаж байсан Харриет Тубманы хөргийг 20 долларын дэвсгэртийн урд талд нэмэх ажлыг түдгэлзүүлж байв. Харин шинэхэн Ерөнхийлөгч Жо Байдены Сангийн яам тус ажлыг хурдасгах арга замыг судалж байна гэж Цагаан ордны хэвлэлийн нарийн бичгийн дарга Жен Псаки даваа гаригт мэдэгдэв.

Хатагтай Тубманыг Эндрю Жексоны оронд 20 долларын дэвсгэртийн нүүр царайгаар томилох шийдвэрийг Сангийн яамны нарийн бичгийн дарга Жейкоб Лью 2016 онд гаргаж байжээ.

Ерөнхийлөгч Дональд Трамп энэ санааг эсэргүүцэж, Төрийн сангийн нарийн бичгийн дарга Стивен Мнучин мөнгөний аюулгүй байдлын шинэ шинж чанаруудыг нэмж оруулах нь нэн яаралтай зорилт болсон гэж үзэж, валютын дахин төлөвлөлтийн энэ хэсгийн ажлыг зогсоосон байдаг. Ноён Мнучин шинэ дүр төрх бүхий мөнгөн тэмдэгтийг 2028 он хүртэл гүйлгээнд оруулах боломжгүй тул шинээр томилогдоод буй Сангийн нарийн бичгийн дарга Жексоныг солих эсэх талаар яриа хийх болно гэж мэдэгджээ.

Ерөнхийлөгч Байден Жанет Л.Елленийг удирдуулахаар нэр дэвшүүлсэн Сангийн яам энэ ажлын хугацааг түргэсгэхээр төлөвлөж байна.

Сангийн яам "Харриет Тубманыг шинэ 20 долларын дэвсгэртийн нүүрэн дээр тавих ажлыг үргэлжлүүлэх арга хэмжээ авч байгаа бөгөөд мөнгөн тэмдэгт нь манай улсын түүх, олон янз байдлыг тусгасан байх нь чухал юм" гэв. 

Сангийн төлөөлөгч 20 долларын дэвсгэртийн шинэ загвар хэзээ гарах талаар мэдээлэлгүй байна.

Ерөнхийлөгч асан Трамп нутаг нэгт популист Эндрю Жексоны шүтэн бишрэгч гэдгээ мэдэгдэж, түүхэн дүрс, хөшөө баримтыг өөрчлөхийг эрс эсэргүүцэж байв.

Төлөвлөгөөний дагуу шинэ загварыг 2020 онд 19-р нэмэлт өөрчлөлт буюу эмэгтэйчүүдэд сонгох эрхийн 100 жилийн ойд танилцуулах ёстой байсан юм. 

Харриет Тубман Мэрилэндэд боолчлолын үед төрсөн ч 1849 онд хойд зүг рүү эрх чөлөөний төлөө зугтах хөдөлгөөнд гар бие оролцсон, Газар доорхи төмөр замын хамгийн алдартай "кондуктор" юм. Тубман энэхүү нарийн нууц сүлжээнд тариалангийн талбайгаас олон зуун гэр бүлийн гишүүд болон бусад боолуудыг эрх чөлөөнд хүргэхийн тулд өөрийнхөө амьдралыг эрсдэлд оруулж байсан. Америкийн иргэний дайны өмнө боолчлолын эсрэг хөдлөгөөний тэргүүлэгч Тубман мөн дайны үеэр Холбооны армид тусалж, сувилагч зэрэг бусад үүргүүдийнхээ хажуугаар тагнуулчаар ажиллаж байсан улс төрийн зүтгэлтэн юм. 

Б.Бүжлхамаа 

Эх сурвалж: nytimes.com