Apple компани өөрөө жолооддог автомашины технологийг урагшлуулж, өөрийн шинэ батерейны технологийг багтаасан суудлын автомашиныг 2024 он гэхэд үйлдвэрлэхээр ажиллаж байна.

IPhone үйлдвэрлэгчийн Титан Төсөл гэгддэг автомашины хүчин чармайлт 2014 оноос эхлэсэн бөгөөд тэд бүхнийг анхнаас өөрсдөө хийх гэж зорьсон ч жигд бус хурдаар урагшилж байгаа юм. Нэгэн цагт Apple програм хангамж дээр бүх анхаарлаа төвлөрүүлнэ гэж байсан бол энэ удаад алсын хараагаа арай өөр зүгт чиглүүлсэн бололтой.  

Тесла компанид ажиллаж байсан Apple-ийн ахмад дайчин Даг Фийлд энэ төслийг 2018 онд удирдахаар буцаж ирсэн бөгөөд 2019 онд багийнхаа 190 хүнийг халжээ. Тэр үеэс хойш Apple компани хангалттай ахиц дэвшил гаргаж, хэрэглэгчдэд зориулагдсан тээврийн хэрэгсэл бүтээхээр зорьж байна. Энэ хүчин чармайлтын талаар мэддэг хоёр хүн хэлэхдээ Apple-ийн төлөвлөгөө олон нийтэд нээлттэй биш тул нэрээ нууцлахыг хүссэн юм.  Олон нийтийн зах зээлд зориулж хувийн тээврийн хэрэгсэл бүтээх Apple-ийн зорилго нь “жолоочгүй” үйлчилгээнд зорчигч тээвэрлэх робо-такси Alphabet компанийн Waymo гэх мэт өрсөлдөгчдөөсөө ялгаатай юм. Apple-ийн стратеги нь батерейны зардлыг "эрс" бууруулж, тээврийн хэрэгслийн хүрээг нэмэгдүүлэх боломжтой шинэ батерейны загвар юм. Apple компани төлөвлөгөө болон ирээдүйн бүтээгдэхүүнийхээ талаар тайлбар өгөхөөс татгалзав.

Тээврийн хэрэгсэл үйлдвэрлэх нь дэлхийн өнцөг булан бүрээс жил бүр хэдэн зуун сая электроникийн бүтээгдэхүүн үйлдвэрлэдэг, гэхдээ хэзээ ч автомашин хийж үзээгүй гүн халаастай Apple компанийн хувьд нийлүүлэлтийн сүлжээний бэрхшээлтэй асуудал юм. Элон Маскийн Тесла машиныг тогтвортой ашиг олох хүртэл 17 жил зарцуулсан. “Хэрэв манай гариг ​​дээр үүнийг хийх нөөцтэй нэг компани байвал энэ нь магадгүй Apple юм.  Гэхдээ энэ нь гар утас биш шүү дээ” гэж Титан Төсөл дээр ажиллаж байсан хүн хэлэв.

Apple брэндийн автомашиныг хэн угсрах нь тодорхойгүй хэвээр байгаа боловч эх сурвалжууд компани нь тээврийн хэрэгсэл үйлдвэрлэхдээ үйлдвэрлэлийн түншдээ найдах байх гэж найдаж байна гэжээ.  Apple-ийн төлөвлөгөөний талаар мэдлэгтэй хоёр хүн цар тахлын улмаас хойшлогдож байгаа нь үйлдвэрлэлийн эхлэлийг 2025 он буюу түүнээс хойшлуулж болзошгүйг анхааруулав.

Бү.Лхамаа