Японы засгийн газар Токио-2020 Олимпийн наадмаас өмнө тамирчдад коронавирусийн вакцин хийлгэхэд нь туслах Олон улсын олимпийн хороо (ОУОХ) -ны саналыг дэмжжээ.
Киодо Ньюс агентлагийн мэдээлснээр, хөгжиж буй орнуудын тамирчид болон албан тушаалтнуудад вакцин хийлгэхэд туслах зорилготой ОУОХ-ны үйл ажиллагааг дэмжсэн агуулгатай захиаг Японы Ерөнхий сайд Ёшихидэ Сугаги арваннэгдүгээр сард Швейцарийн Женев дэх Вакцины Холбоо болох Гави руу илгээсэн аж.
Өнгөрсөн сард ОУОХ-ны ерөнхийлөгч Томас Бах үг хэлэхдээ "Олимпод оролцох хүсэлтэй тамирчдад вакцинжуулалтыг заавал хийлгэх нь хэт холын байх болно" гэж хэлсэн. Гэхдээ Бах яриан дундаа тамирчдыг вакцинд хамруулах нь маш том "Хүндэтгэлийн тэмдэг" болох болно гэж хэлсэн юм.
ОУОХ бусад байгууллагуудтай вакцин нийлүүлэх "хүрээ" бий болгохыг эрмэлзэж байгаа. Гави болон ДЭМБ нь дэлхий даяар коронавирусийн эсрэг вакцин боловсруулах, түгээх ажлыг түргэсгэх зорилготой Ковакс төслийг хэрэгжүүлнэ. Аравдугаар сард Японы засгийн газар 2021 онд 5 тэрбум доллар босгохоор төлөвлөж буй уг төслийг санхүүжүүлэхэд 130 сая доллар амласан. Харин ОУОХ-оос "Токио 2020"-ийг аюулгүй зохион байгуулах үүднээс вакцин хийлгэхэд шаардагдах зардлын зарим хэсгийг хариуцахаар санал болгов.
Тэрээр үйлдвэрлэгчид болон бусад эрүүл мэндийн мэргэжилтнүүдтэй хэлэлцээр хийж байгаа гэдгээ мэдэгдсэн боловч тамирчдыг вакцин хийлгэх хамгийн их шаардлагатай хүмүүсийн урдуур оруулж, дараалалын өмнөх рүү “үсэргэж” чадахгүй гэж мэдэгджээ. Мөн өмнө нь хэд хэдэн удаа вакцин бол олимпын наадмыг амжилттай зохион байгуулахад туслах мөнгөн сум биш гэж мэдэгдэж байсан.
Коронавирусийн тахлын улмаас Олимпын наадам 2021 оны 7-р сарын 23-наас 8-р сарын 8-нд, харин Паралимпийг 8-р сарын 24-өөс 9-р сарын 5 хүртэл хийхээр төлөвлөж хойшлуулсан.
"Токио 2020" саяхан зөвхөн ингэж хугацаа хойшлуулахад 2.8 тэрбум доллар зарцуулсан гэж мэдэгдсэн. Токио хотын захиргаа 1.1 тэрбум доллар төлж, Зохион байгуулах хороо нэг тэрбум доллар төлнө гэсэн мэдээлэл байна. Үлдсэн 700 сая долларыг Японы засгийн газар хариуцах байсан. "Токио 2020"-ийг 3-р сард хойшлуулахаас өмнө ойролцоогоор 13 тэрбум доллар зарцуулахаар төлөвлөж байжээ.
Бү.Лхамаа
