Талархлын баярыг байгаа зүйлдээ талархаж, ёс заншил, итгэл бишрэлээр бурхандаа талархаж тэмдэглэж өнгөрүүлдэг. Талархлын баярыг олон оронд тэмдэглэдэг ч АНУ болон Канадад үндэсний баяр болгон өргөн дэлгэр өнгөрөөдөг байна.

АНУ-д арваннэгдүгээр сарын сүүлчийн долоо хоногийн пүрэв гаригт, харин Канадад аравдугаар сарын хоёр дахь долоо хоногийн даваа гаригт тэмдэглэдэг байна.

АНУ-д энэ жилийн Талархлын баяр өнөөдөр тохиож байна.

Энэ өдөр уламжлал ёсоор гэр бүлээрээ цуглаж, бие биендээ талархал илэрхийлж, дайлдаг өдөр юм. Гэвч дэлхий нийтээрээ цар тахалтай тэмцэж, хөл хорионд найман сар амьдарч байна. Харин АНУ-ын бараг бүх муж улсад дэлгэрээд буй ковидын тархалт болон албанынхны сэрэмжлүүлгийг үл харгалзан Америкчууд уламжлалт Талархлын баяраа тэмдэглэхээр шийджээ. Хуучны адил тэд автомашин болон онгоцоор аялахаар төлөвлөж, ачаалал ихэсжээ. Тэдэнд коронавирус хэдийн айдас биш болсон бололтой. 

Талархлын баяр нь намрын ургац хураалтын дараа Бурханд талархал өргөж залбирдгаас үүдсэн гэдэг. 1536 оноос өмнө христийн сүмүүд 95 баярт өдөртэй, ням гаргуудад 52 баяр тэмдэглэдэг байжээ. Тиймээс баярын өдрүүдийг багасгаж, ургац хураалтын баярыг өөр баяраар орлуулахыг хүсээд чадаагүй гэнэ. 

Хамгийн анх Ерөнхийлөгч Жорж Вашингтон 1789 оны аравдугаар сарын 26-нд дэмжиж тусалдаг бурхандаа авсан ивээл ерөөл, тусламжаа санан, чин сэтгэлээсээ талархаж, ёсыг бодож ачийг хариулах залбирлын өдрийг талархлын баяр болгох санал тавьжээ.  

Арвин их ургац авсан жилд талархлын баярыг тэмдэглэдэг гэсэн хуучны бичээс бий. Удалгүй төрийн удирдлагууд шашны шинжтэй баяр болгохоор тогтож өдгөө Америкт болон Канадад талархлын баяр нь олон нийтийг хамарсан үндэсний том тэмдэглэлт өдөр болсон юм.

Энэ баярыг тохиолдуулан ихэнх албан байгууллага 4 өдрийн амралт өгдөг бөгөөд хүмүүс аав ээж, ах дүүдээ зочилж, газар үзэж, зугаалж хамтдаа цагийг сайхан өнгөрөөдөг уламжлалтай. Мөн энэ баярт зориулсан урлагийн тоглолт, парад хүртэл болдог. Ийм болохоор АНУ-ын хэмжээгээр энэ өдөр хотоос хот руу зорчих гэсэн хүмүүсийн урсгал ихэсч, авиа компаниудын билет сарын эхнээс алга болдог байна.