Япон улс олон зүйлээрээ алдартай боловч дэлхий дахинаа “Япон” гэдэг үгний араас дагалдаж, танил болсон өөр нэг үг бол “Нара буга” юм. Нара паркад 1200 гаруй буга амьдардаг бөгөөд тэднийг хуулиар хамгаалдаг. Харамсалтай нь үндэсний баялаг болсон тэдгээр бугыг харахаар цувдаг олон жуулчдын заримынх нь үлдээсэн хуванцар хог хаягдлыг буганууд идэж орхидог байна. Өнгөрсөн жил нэг бугын ходоодоос нь 4 кг илүү хог хаягдал гарч байжээ.
Энэхүү үйл явдалд сэтгэл эмзэглэсэн нутгийн уугуул иргэд бугын ходоод шингээх боломжтой будааны хивэгээр хийсэн цаасан уутны шийдэл гаргажээ.
Жуулчдад "Нара парк"-аар зугаалах үедээ бугуудыг хуванцар сав баглаа боодолгүй тусгайлан хийсэн элсэн чихэргүй жигнэмэгээр хооллохыг зөвшөөрдөг. Гэсэн хэдий ч олон жуулчид бугыг зөвшөөрөгдснөөс өөр бусад хөнгөн зуушаар хооллож, алхаж явах зам зуураа хүнсний сав баглаа, боодол хаядаг гэж үздэг. Дараа нь буга уутыг үнэрлэж, хоол хүнс гэж бодоод идчихдэг байна.
Нарагийн оршин суугч, хог боловсруулах компани ажиллуулдаг Такаши Накамура буганууд андуурч хог залгиад үхэж байгаа тухай сонссоныхоо дараа ийм санаа бодож олжээ.
Тэрээр BBC Japan-д өгсөн ярилцлагадаа нэг нутгийн гоо сайхны бөөний худалдаачин, дизайнер хоёр хүнтэй хамтран буганд ээлтэй уут зохиосон гэдгээ хэлжээ.
Тус цаасан уутыг дахин боловсруулсан сүүний хайрцаг, цагаан будааны хивгээр хийсэн бөгөөд энэ нь бугыг хооллож болдог жигнэмэгтэй адилхан орцтой гэсэн үг юм.
Ноён Накамура хэлэхдээ “3500 орчим уутыг хотын аялал жуулчлалын товчоо, орон нутгийн банк, эмийн сан зэрэг дотоодын 6 орчим компанид худалдсан” гэж мэдэгдэв.
Asahi Shimbun мэдээллийн сайтад мэдээлснээр тус уутыг Японы хүнсний судалгааны лабораторийнхон туршиж үзсэн бөгөөд хэрэглэхэд аюулгүй гэсэн хариу гарсан байна.
Мөн энэ сайтын дурьдснаар, уут нэг бүр 100 иений (0.73 фунт; 0.95 доллар) үнэтэй бөгөөд ердийн гялгар уут ихэвчлэн хэдэн цент орчим үнэтэй байдаг байна.
Бү.Лхамаа