Өөрийн догшин гоо үзэсгэлэнгээр яруу найргийн хувь оршихуйг бусдад ойлгуулсан эгэл бөгөөд шулуун зоримог илэрхийллийг нь үнэлж Луиз Глюкт энэхүү шагналыг гардуулж буйг Нобелийн хороо мэдэгджээ.

Шведийн академийн Нобелийн хороо 2020 оны утга зохиолын шагналыг Америкийн яруу найрагч эмэгтэй Луиза Глюкт олгосноо пүрэв гаригт зарлажээ.

"Энэ эмэгтэй нь орчин үеийн америк уран зохиолын хамгийн гарамгай уянгын яруу найрагчдийн тоонд багтдаг. Түүний яруу найрагт уран егөөдөл, хурц хэллэг хангалтай их байдаг” хэмээн Нобелийн хорооны  дарга Андерс Ульссон хэлсэн байна.

Шведийн академийн байнгын нарийн бичгийн дарга Матс Мальм яруу найрагч Глюктай утсаар ярин энэ мэдээг дуулгажээ. “Тэнд өглөө эрт байгаа ч тэрээр мэдээнд гайхаж, аз жаргалтай байгаагаа хэлсэн” гэлээ.

Луиза Глюк 1943 онд Нью-Йоркт төржээ. Одоо Массачутсетс мужийн Кембрижид амьдардаг ба Йелийн их сургуулийн англи хэлний профессор. Тэрээр уран зохиолд “Анхных” гэдэг шүлгээр 1968 онд орж иржээ. Нэг их удалгүйгээр орчин үеийн америк уран зохиолын хамгийн гарамгай яруу найрагч гэсэн алдар нэртэй боллоо. Тэрээр 1993 онд Пулитцерийн шагнал авч байсан юм. Глюк яруу найргийн 12 түүвэр, шүлгийн эссе цомгуудыг хэвлүүлжээ.

"Ахиллийн ялгуусан бадрал" (1985), "Арарат" (1990) түүврүүдээр Америк ба гадаадын олон нийтийн анхааралд оржээ. "Зэрлэг цахилдаг" (1992), "Аверно" (Персефоныг Аид хулгайлсан домгийн чөлөөт шүлэглэглэл, 2006) зэрэг цомгуудаар алдар нэрээ улам нэмсэн байна. "Faithful and Virtuous Night, 2014" түүвэр нь АНУ-ын уран зохиолын хамгийн нэр хүндтэй National Book Awards шагналыг түүнд авчирчээ.

Нобелийн хороо тэмдэглэснээр, Глюкийн уран бүтээл нь тодорхойг дамжуулах эрмэлзлэлд хөтлөгдсөн ба түүний гол сэдэв нь хүүхэд нас, гэр бүлийн амьдрал, эцэг, эх, ах, дүү нартайгаа байх дотно харилцаа юм. Бодьгал туршлагаа олны болгох эрмэлзлэлдээ тэр үлгэр домог, уран зохиолын сонгодог сэдвээс онгодоо оруулж иржээ.

М.ЦОГТ