Гадаад харилцааны сайд Н.Энхтайван ОХУ-ын Гадаад хэргийн сайдтай албан ёсны хэлэлцээ хийлээ.
Сайд Н.Энхтайван уулзалтын үеэр коронавирусийн дэлхийн анхны вакциныг гарган авсанд ОХУ-д баяр хүргэсэн юм.
Тэрээр "Цар тахлын үед хийж буй миний айлчлал бидний харилцаанд шинэ уур амьсгалыг авчирч, хоёр орны харилцааг шинэ голдиролд оруулна гэж үзэж байна. ОХУ-д хийж буй айлчлал нь Монгол Улсын шинэ Засгийн газрын гишүүний хувиар хийж буй анхны айлчлал юм. Энэ нь Монгол-Оросын харилцааг хөгжүүлэхэд бид ямар их ач холбогдол өгч байгааг харуулж байна. Мөн би коронавирусийн дэлхийн анхны вакциныг гарган авч чадсан эмч нар, эрдэмтдэд, ОХУ-ын Засгийн газраас гаргасан хүчин чармайлтад Монголын ард түмний өмнөөс баяр хүргэхийг хүсэж байна" гэжээ.
ОХУ-ын Гадаад хэргийн сайд С.Лавров, цар тахлын улмаас хязгаарлалт тогтоосон хэдий ч хоёр орны харилцаа хөгжиж байгааг онцлон тэмдэглэжээ.
Коронавирусийн халдвартай тэмцэх чиглэлээр ОХУ, Монгол Улсын Эрүүл мэндийн яамд болон эмнэлгийн бусад байгууллагын хамтын ажиллагаа үргэлжилнэ гэж С.Лавров хэлэлцээний дараа мэдэгдлээ.
Тэрээр "ОХУ, Монгол Улсын хооронд коронавирустэй тэмцэх асуудлаар хамтын ажиллагаа хэдийнэ тавигдсан. Бид энэ чиглэлээр шаардлагатай тусламжийг харилцан үзүүлэх зорилгоор цаашид арга хэмжээ авахаар тохиролцлоо. Түүнчлэн Эрүүл мэндийн яамдын болон холбогдох бусад албадын шугамаар хамтын ажиллагаагаа гүнзгийрүүлэх тохиролцоонд хүрсэн" гэсэн байна.
Н.Ф.Гамалеян нэрэмжит хүрээлэнгийн эрдэмтдийн гарган авсан "Спутник V" вакцин нь улсын бүртгэлд бүртгэсэн дэлхийн хамгийн анхны коронавирусийн вакцин болсон билээ. Уг вакциныг наймдугаар сарын 11-нд олбан ёсоор бүртгэсэн юм.
Монгол улсын Гадаад харилцааны сайд Н.Энхтайван есдүгээр сарын 20-21-ний хооронд ОХУ-д албан ёсны айлчлал хийж байна.