Коронавирусийн эсрэг дэлхийд анхных болон бүртгэгдсэн орос вакциныг "Спутник V" /Хиймэл дагуул-5/ гэж нэрлэв. 1957 онд дэлхийн анхны хиймэл дагуулыг хөөргөсөн их цөмрөлтийн дагуу ийм нэрийг вакцинд өгсөн байна гэж Риа новоста агентлаг мэдээлжээ

"Спутник-1" нь дэлхийн сансар судлалыг идэвхжүүлсэн юм.

COVID-19 вирусийн халдварын эсрэг Оросын шинэ вакцин нь дэлхийн хамтын нийгэмлэгт "Спутник"-ын агшиныг бий болголоо. Ийм харьцуулалт нь түүнд "Спутник V" нэрийг өгүүлжээ.

Наймдугаар сарын 11-нд хүний аденовирусийн хэсэг дээр үндэслэгдсэн "Гам-КОВИД-Вак" гэх векторын хоёр бүтцийн вакциныг Оросын Эрүүлийг хамгаалах яам бүртгэн авчээ. Тэр нь зах зээл дээр бүртгэгдсэн шинэ SARS-COV-2 халдварын эсрэг анхны вакцин боллоо. Шинэ вакцин хүний дархлалыг хоёр жилийн хугацаанд бий болгож байгаа гэж ОХУ-ын Эрүүл мэндийн яам мэдээлэв.

Оросын Ерөнхийлөгч Владимир Путин шинэ вакциныг ойрын хугацаанд бөөнөөр үйлдвэрлэж эхлэнэ гэж найдаж буйгаа хэлээд вакцинжуулалт нь сайн дурын үндсэн дээр явагдах ёстой гэж онцолжээ. Мөн ерөнхийлөгч Путины хоёр охины нэг нь өөр дээрээ шинэ вакцин туршсаныг тэрээр хэлсэн байна. 

Оросын Шинжлэх ухааны академийн Чумаковын нэрэмжит дархлал биологийн эм бүтээн судлах Холбооны шинжлэх ухааны төв долоодугаар сарын 25-нд коронавирусийн эсрэг вакцин нийлүүлэх ДЭМБ-ын тендерт оролцохоор өрөгдлөө өгсөн юм.

Мөн түүнээс арай өмнө Эрүүл мэндийн сайд Мурашко Гималейн нэрэмжит Халдвар ба микробиологийн судлалын Шинжлэх ухааны судалгааны төвийн бүтээсэн халдварын эсрэг вакциныг наймдугаар сарын эхний 10 хоногт бүртгэнэ гэсэн байв. Шинэ вакцин нь үр дүнтэй, аюулгүй нь батлагдаад байгаа гэсэн юм.

Өнөөдрийн байдлаар дэлхийд вирусийн халдвараар өвчлөгдөгчдийн тоо 20 саяыг даваад байгаа. Мөн 800 мянгаад хүн энэ халдварын улмаас нас баржээ.

Вакцин бүртгэгдсэнд Палестин хамгийн түрүүнд Орост баяр хүргэн түүнийг авч хэрэглэх анхны орон болохоор найдаж буйгаа Палестины Ерөнхийлөгч Махмуд Аббас Владимир Путинд ирүүлсэн цахилгаандаа өгүүлжээ.

Мөн Сербийн Ерөнхийлөгч Александр Вучич Оросын вакциныг хамгийн түрүүнд хүлээн авахад Серби бэлэн гэсэн байв. Филиппины Ерөнхийлөгч Дутарте хамгийн түрүүнд орос вакцинаар тариулна өөрийн оронд түүнийг үйлдвэрлүүлэх лицензийг авна гэсэн юм.

Өнөөдрийн байдлаар дэлхийн хориод орнууд вакцин авахаар Оростой ярилцаж байгаа ажээ. Түүнийг арваннэгдүгээр сараас Бразилийн нэг мужид үйлдвэрлэж эхлэх гэнэ.

М.Цогт