АНУ, Их Британи, Канад улсаас коронавирусийн вакцин үйлдвэрлэхтэй холбоотой мэдээллийг Орос улс хулгайлахыг оролдсон гэж Их Британийн кибер аюулгүй байдлын төв мэдэгдсэн байна. Энэ мэдэгдэлд Оросын тагнуулын байгууллагын бүтцэд ордог кибер тагнуулын APT29, Dukes, Cozy Bear бүлэглэлүүд нь эдгээр улсын эм, вакцин бүтээхэд оролцож байсан төрөл бүрийн байгууллагуудын мэдээллийн сан руу бүтэн жилийн туршид халдаж байсан гэжээ.

Хакерууд вакцин бүтээгчдийн компьютер лүү нэвтрэх, мэдээлэл хулгайлахын тулд программ хангамжийн WellMess, WellMail зэрэг аюултай программ ашиглаж байсан гэж уг мэдэгдэгдэлд тэмдэглэсэн байна.

Тагнуулынхны үзэж байгаагаар бол Оросуудын хулгайлсан мэдээллүүд нь өнөөдөртөө нэг их үнэ цэнэтэй биш, хожим ач холбогдолтой болсон цагт ашиглаж болох мэдээллүүд байсан гэжээ. 

Их Британид SARS-CoV-2-оос урьдчилан сэргийлэх вакциныг Оксфордын их сургууль болон Лондонгийн Imperial College хоёрт л боловсруулж байгаа юм. Энэ хоёр байгууллага хоёулаа хакерийн дайралтад өртсөн гэж тусгай албаны эх сурвалж хэлсэнийг Английн хэвлэлүүд мэдээлж байна. Гэхдээ ямар хохирол учруулсныг мэдээлээгүй байгаа юм. 

“Коронавирусийн цар тахалтай тэмцэж байгаа байгууллагууд руу Оросын тагнуулын байгууллага халдаж байгаа нь маргашгүй үнэн. Британи, түүний холбоотнууд дэлхий нийтийг энэ аюулаас аврахын төлөө нэн төвөгтэй үүрэг гүйцэтгэж байхад Оросууд зөвхөн өөрсдийн амин хувийн эрх ашгаа л бодож байна. Британи ийм кибер халдлагын эсрэг, ийм үйлдэлд буруутай этгээдэд хариуцлага хүлээлгэхийн төлөө холбоотнуудтайгаа нягт хамтран ажиллах болно” гэж Их Британийн Гадаад хэргийн сайд Доминик Рааб хэлсэн байна.

Харин ОХУ-ын Ерөнхийлөгчийн хэвлэлийн нарийн бичгийн дарга Дмитрий Песков энэ тухайд судалгааны төв, эмийн компанийн компьютерийг хэн эвдэлж халдаж болохыг Москва ёстой мэдэхгүй, энэ талаар тэдэнтэй ямар ч харилцаа холбоо байхгүй гэжээ.

Эх сурвалж: "Ардчилал таймс" сонин