Кашмир мужтай хөрш зэргэлдээ оршдог Ладакх мужид Хятадын цэргүүдтэй мөргөлдсөний улмаас Энэтхэгийн 20 цэрэг амиа алдсан гэж тус улсын эрх баригчид мэдэгджээ. Энэ нь тус бүс нутаг дахь Энэтхэг-Хятадын хилийг орлодог хяналтын шугам дээр 45 жилийн хугацаанд анх удаа цэргүүд амиа алдсан тохиолдол болж буй юм.

Галван хөндий орчимд болсон мөргөлдөөний үеэр нэг офицер, хоёр цэрэг амиа алдсан гэж Энэтхэгийн арми урьд  нь мэдээлсэн байна. Гэсэн хэдий ч дараа нь хэд хэдэн хүн гэмтэл бэртлээс болж нас барсан байна.

Үүний зэрэгцээ Энэтхэгийн хэд хэдэн хэвлэлүүдэд мэдээлж буйгаар, мөргөлдөөн болсон газар буун дуу гараагүй бөгөөд Энэтхэгийн цэргүүдийг “үхтэл нь зодсон” гэж таамаглаж байгаа аж. Энэ мэдээлэл албан ёсоор батлагдаагүй боловч сүүлийн долоо хоногуудад хяналтын шугам дээр цэргүүдийн хооронд удаа дараа зодоон болж байжээ.

Мөргөлдөөний үеэр хоёр тал хоёул хохирол амссан гэж Энэтхэгийн хэвлэлүүдэд бичжээ. Харин Хятадын арми цэргүүд нь амиа алдсаныг хүлээн зөвшөөрөөгүй бөгөөд Энэтхэгийн цэргүүд амь үрэгдсэн тухай мэдээлэл өгөөгүй гэж Хятадын ГХЯ-ны төлөөлөгч мягмар гарагт болсон хэвлэлийн бага хурлын үеэр мэдэгдсэн байна.

Энэтхэг, Хятадын хяналтын шугамыг маш муу зааглажээ. Үүний зэрэгцээ энэ бүсэд гол мөрөн, нуур, цастай оргилууд байдаг нь газарзүйн байрлал нь өөрчлөгдөх магадлалтай гэсэн үг бөгөөд Энэтхэг, Хятадын армийн цэргүүд маш олон цэгт нүүр тулахад хүргэдэг аж.   

Хоёр улсын Батлан хамгаалах яамны төлөөлөгчид хурцадмал байдлыг намжаах зорилгоор уулзахаар төлөвлөж байна гэж Энэтхэгийн арми мэдэгджээ. Хятадын тал ч мөн ийм уулзалт болно гэдгийг нотолсон бөгөөд улсынх нь хилийг зөрчсөн гэж Энэтхэгийг буруутгасан байна.  

Хятадын Гадаад хэргийн яамны хэвлэлийн төлөөлөгч Жао Лицян мягмар гарагт хийсэн хэвлэлийн бага хурал дээр хэлэхдээ, Энэтхэгийн цэргийнхэн даваа гарагт хяналтын шугамыг хоёр удаа давж "хятад ажилтнуудыг өдөөн хатгаж, халдлага үйлдсэн нь бие махбодын ноцтой зөрчилдөөнд хүргэсэн" гэжээ.

Харин Энэтхэгийн Гадаад хэргийн яам Хятадыг өнгөрсөн долоо хоногт байгуулсан хяналтын шугамыг хүндэтгэх тухай гэрээг зөрчсөн гэж буруутгасан байна. “Хятадын тал энэ бүс дэх статус-квог дангаар өөрчлөхийг оролдсон нь ширүүн мөргөлдөөн болох шалтгаан болсон" гэж тус яамны мэдэгдэлд дурдсан байна.