“Ёстой юм ёсоороо”, хуультай юм хуулиараа л өрнөж байна. УИХ-ын ээлжит сонгуулийн эхний бичлэг задарчээ.

Гэхдээ энэ удаа харин МАН-аас биш, АН-аас задрав. "Хэн нэгэн" АН-ын дарга С.Эрдэнийн "нууц бичлэгийг" задалжээ. Гадаадад суугаа монголчуудаа эх оронд нь авчирна гэсэн Ерөнхий сайдыг эсэргүүцэж, “Цөөнхийн эрх ашгийн төлөө олонхийн эрх ашгийг хохироож болохгүй. Гадаадад суугаа иргэдээ авчирахын тулд эх орондоо суугаа иргэдийнхээ аюулгүй байдлыг золисолж байна” гэж мэдэгдэл хийсэн билээ. Харин АН-ын пиарчид намын даргадаа “Энэ 10 мянган хүнийг авчирья гэж хэлсэн ч намд ашиггүй, авчирахгүй гэсэн ч ашиггүй. Тиймээс энэ асуудал дээр нам дуугүй байя” гэсэн санал хэлсэн юм байна. "Хэн нэгэн" энэ яриаг бичиж аваад олон нийтийн сүлжээнд тавьжээ. 

Саяхан Ерөнхий сайд У.Хүрэлсүх өнгөрөгч даваа гаригт болсон УОК-ийн өргөтгөсөн хуралдаан дээр хэлсэн үгэндээ “Монгол Улс хилээ нээхгүй” гэж мэдэгдсэн. Мөн “Иргэдээ татан авах үйл ажиллагаа үргэлжилнэ. Гэхдээ 10 мянган хүнийг нэг дор татан авч чадахгүй” гэсэн билээ. Энэ ч гэсэн зөв. Үүн дээр татан авах ажиллагааг гардан гүйцэтгэж байгаа мэргэжлийн байгууллагууд, УОК нөхцөл байдлыг судалж, нөөц боломжоо тооцсоны эцэст шийдвэрээ гаргаад явахёстой гэсэн үг.

Түүнээс биш, У.Хүрэлсүх гэдэг хүн намын сонгуулийн дундуур энэ ажил руу давхиж ороод, олон нийтэд таалагдах гэсэн амлалт аваад явбал иргэдээ татан авах ажиллагаа ч гэсэн бүр мөсөн нурна. Ингээд зогсохгүй эх орондоо байгаа гурван сая хүний эрүүл мэнд, аюулгүй байдал ч гэсэн алдагдахад хүрнэ гэсэн үг. 

Тэгэхээр өнөөдрийн хувьд авчирна, авчирахгүй гэдэг гол асуудал биш болчихоод байна. Харин авчирсан хойноо хэрхэх вэ, авчирахдаа яаж авчирах вэ? л гэдэг гол асуудал.

Жишээ нь, Улаан-Үдийн оюутнуудтай цуг ирсэн, эмч мэргэжилтэй Алтанхундана гэх эмэгтэй “Оросын хил дээр 20, 20-иороо ирсэн оюутнуудыг хилээс нааш манайхан 40, 40-өөр нь автобусанд чихсэн. Цонхыг хаасан битүү вагонд 15 цаг түгжсэн” гэх мэтээр ярьсан билээ. Хүүтэйгээ хоёулаа халдвар авч, ХӨСҮТ-д тусгаарлагдаад байгаа эмч бүсгүйг маргааш нь ЭМЯ-ны ажилтан “Алтанхундага Орост байхдаа халдвар авчихаад Монголд ирээд авсан гэж худал мэдээлэл тарааж байна. Орост байхдаа халдвартай оюутнуудад эмчилгээ хийж байсан” гэх мэдэгдэл хийсэн байдаг.

Асуудлын гол нь хэн хаана халдвар авсандаа биш. Харин иргэдээ татаж авна гэсэн Засгийн газар, Улсын онцгой комиссоос шийдвэр ажил хэрэг дээрээ яаж хэрэгжиж байна вэ? л гэдэг асуудал. Эмнэлэгт  тусгаарлалтад байгаа /өөрөө халдвар авсан/ эмч хүн худал мэдээлэл тараана гэж лав байхгүй. Харин татан авах ажиллагаа болон түүнийг хэрэгжүүлж байгаа байдал хэлбэрийн төдий болоод, халдвар хамгаалалтын дэглэмээ сахиж чадахгүй бол яах вэ?

Зөвхөн тасалбарын мөнгөө хураахын тулд галт тэргийг хил дээр 15 цаг саатуулсан, нэг вагонд 60-70-аар чихсэн халдвартай оюутныг бусад оюутнуудтай хамт тээвэрлэсэн энэ тэр чинь эмч Улаан-Үдэд байхдаа халдвар авсан уу, энд ирээд халдварласан уу? гэдэгтэй огт хамаагүй асуудал.

Хамгийн гол иргэдээ тээвэрлэх явцдаа халдвар хамгааллаа сахиж чадахгүй, авчираад эмчилж эдгэрүүлж чадахгүй юм бол “эх орондоо ирэх ёстой” гэж шоудах нь утгагүй болчихож байгаа юм. Энүүхэн хилийн цаана байгаа Улаан-Үдээс 200-300 оюутан авчирахдаа ингэж барьц алдах юм бол ийм ажил зохион байгуулах нь ч угаасаа утгагүй болно. Жаахан л сэтгэл гаргачих асуудал шүү дээ. 20, 20-иор нь хоёр автобусанд хуваагаад суулгачихын оронд 40-өөр чихэж, нийтийн вагонд 60-70-аар ачиж ирчихээд энд ирсэн хойноо “Эмчил” гэж эмнэлэг, эмч нарыг загнах нь ч гэсэн утгагүй. Угаасаа халдвар хамгааллаа сахиж, хүмүүсээ тусгаарлаж чадахгүй бол татан авалт хийхийн ч шаардлага байхгүй.

Юу ч хийсэн сэтгэл дутна. Энэ бараг Монгол хүний төрөлх чанар юм шиг болчихлоо, сүүлийн үед. Тээвэрлэхийн тулд л тээвэрлэж байна уу, эсвэл хүнээ гэсэн сэтгэлээр тээвэрлэж, иргэдээ татан авч байна уу? гэдэг чинь огтоос өөр ойлголт. Ийм тохиолдолд бараг татан авахын ч хэрэггүй болчихож байгаа юм. Нөгөө Ерөнхий сайдын хээрийн эмнэлэг зохион байгуулаад, дадлага сургууль хийгээд байсан чинь зүгээр л олон нийтэд зориулсан үзүүлэх тоглолт, шоу байсан байх нь уу? 

Улаан Үдээс ирсэн оюутнууд замын зардалгүй байсан, тасалбарын үнийг хувийн дансанд тушаахыг шаардсан, мөнгөө төлөхөөс нааш галт тэргийг хөдөлгөхгүй гэсэн гэх мэтчилэн хөгийн л юмнууд яригдаж байна. Оюутнууд болохоор, эрх орондоо ирэх нь юу юунаас илүү чухал байсан учраас дуугараагүй л байх. Гэсэн ч өмнөөс нь дуугарч өгсөн эмчид баярлахаас аргагүй. 

Б.ЗАЯА