Коронавирусийн халдварын эсрэг судалгааг зургаадугаар сард дуусгаад есдүгээр сард бүртгүүлэхээр төлөвлөөд байгаа тухай шинжлэх ухааны "Вектор" төвийн  ерөнхий захирал Ринат Максютов генетикийн технологийг хөгжүүлэх асуудлаар Ерөнхийлөгчийн зохион байгуулсан видео хурал дээр мэдэгджээ.

Тэрээр "Зургаадугаар сард бид клиникийн туршилтын өмнөх аюулгүй байдал ба үр дүнгийн бүх судалгааг дуусгана. Энэ үеэр эмнэлэгийн туршилт хийхэд хангалттай  хэмжээний тунг бэлтгэсэн байх юм. Эмнэлэгийн туршилтийн нэг, хоёрдугаар шатанд бид вакциныг 300 сайн дурынхан дээр турших юм. Дараа нь бид туршилт амжилттай болвол вакциныг есдүгээр сард бүртгүүлнэ гэж тооцоолж байгаа" гэсэн юм.

Вакцины эрхийг улсынхаа нэр дээр бүртгүүлэх хэрэгтэйг харин ОХУ-ын ерөнхийлөгч Путин сануулжээ.

Мөн үеэр COVID-19 халдварыг эмчлэх левилимаб гэдэг орос эмийг 11 төвд эмнэлэгийн туршилтад оруулсан тухай Biocard биотехнологийн компани мэдээлэв.

Тавдугаар сарын 12-ноос эхлэн туршсан эмийн үйлчилгээ нь өвтөнүүдэд сайнаар нөлөөлж байгааг эмч нар мэдээлсэн байна. Энэ эм нь амь насанд халтай дархлалын системийн хэт идэвхитэй ажиллагааг зохицуулахад зориулагдсан байна.

Мөн "Фавипиравир" гэх эмийн эмнэлгийн туршилтын урьдчилсан дүн гарсан байна. Коронавирусийн халдвартай 40 хүн дээр туршсан эмийн үйлчилгээ нь өвчлөлтийн хугацааг нааш татсан ба тав хоногийн дараа тэдний вирусний шинжилгээ нь сөрөг гарчээ.

Европын эм тарианы агентлагийн өндөр тушаалтан Марко Кавальери "Шинэ коронавирусийн эсрэг вакцин сайнаар бодоход жил орчмын дараа гарч ирнэ" гэж хэлснийг Reuters дамжуулжээ.

М.ЦОГТ