Шинэ төрлийн коронавируст халдварт өвчин нь ДОХ шиг бүрэн устдаггүй өвчин болох магадлалтай гэж Дэлхийн Эрүүл Мэндийн Байгууллага өчигдөр мэдээлжээ.
ДЭМБ-ын шуурхай хөтөлбөрийн захирал Майк Райан “Бидний хувьд бодит байдалтай эвлэрэх нь чухал гэж бодож байна. Одоогоор хэн ч энэ өвчнийг хэзээ устаж арилах талаар хэлж чадахгүй байна” гэжээ.
Уг өвчний эсрэг вакцин гарсан ч өвчин бүрэн устахгүй, харин хүн төрөлхтөн хяналтдаа оруулж чадна гэж тус байгууллага дүгнэжээ.
Тэрээр "Хэдийгээр вакцин нь гарсан ч улаан бурхан өвчин бидний дунд байсаар байгаа шүү дээ" гэсэн юм.
Өнөөдрийн байдлаар дэлхий дахинд коронавирусийн эсрэг вакцин бүтээх 100 гаруй төсөл хэрэгжиж байгаагаас Герман, АНУ зэрэг улсуудад клиник туршилтын шатандаа ороод байгаа билээ.
Одоо дэлхийн улс орнууд хорио цээрийн дэглэмээс гарч хэрхэн хэвийн амьдралд эрсдэл багатай шилжихэд бүх анхаарлаа хандуулж байна.
Бид коронавирустэй зэрэгцэн амьдрах цаг үед шилжих хэрэгтэй болжээ.
