COVID-19 халдвар гарсан дэлхийн улс орнуудын нөхцөл байдлыг ЭМЯ-ны Гадаад харилцаа, хамтын ажиллагааны хэлтсийн дарга Б.Янжмаа танилцууллаа.
Ням гаригт Итали, Испани, Франц улсад нас баралт хамгийн бага /Испани 164, Итали 174, Франц 135/ бүртгэгджээ.
Испани: Тус улсад хөл хориогоо үе шаттай сулруулж эхэлжээ. Ингэхдээ эмнэлгээс гарах хүний тоо, шинэ халдварын тоо, эрчимт эмчилгээнд орох хүний тоо зэрэг эмнэлгийн байгууллагуудад ирэх ачааллыг хамгийн түрүүнд харгалзан үзнэ гэж мэдэгдсэн байна. Тус улсын хувьд 10,000 хүнд ногдох эрчимт эмчилгээний орны тоогоо 1,5-2 дахин нэмэгдүүлэх, хүнд өвчтөнийг хүлээх авах орны тоогоо 37-40 хувиар нэмэгдүүлэх шаардлагатай байгаа аж.
Нийт 42,000 гаруй эмнэлгийн ажилтан коронавирусийн халдвар авсан нь нийт бүртгэгдсэн тохиолдлын 19 орчим хувь байгаа тухай тус улсын ЭМЯ-наас мэдээлжээ.
ОХУ: Өнгөрсөн 24 цагийн хугацаанд 10,600 гаруй шинэ тохиолдол бүртгэгдэж, нийт халдварын тоо 134 мянгаас давсан байна. Батлагдсан тохиолдлуудын тал шахам хувь нь эмнэл зүйн шинж тэмдэг илрэхгүй байгаа, мөн одоогийн байдлаар 1,280 нас баралт бүртгэгдээд байгаа тухай мэдээлжээ.
Бразил: Тус улсад өчигдөр 4,600 шахам шинэ тохиолдол, 275 нас баралт бүртгэгдсэн байна. Тус улсын батлагдсан тохиолдлын тоо 101,000 давсан бол нас баралт 7,000 гаруй болжээ.
Сингапур: Шинээр 657 тохиолдол бүртгэгдэж, нийт тохиолдол 18,200 гаруй болсон талаар тус улсын ЭМЯ-наас мэдээлжээ.
Дөрөвдүгээр сар гарснаас хойш гадаад ажилчдын дотуур байранд голомтлон тархсан халдварыг хяналтдаа авахын тулд тэдгээр ажилчдыг дотуур байранд нь хөл хорьж, тусгаарлан шинж тэмдэг илэрсэн болон шинжилгээний хариу эерэг тохиолдлуудыг тусгайлан бэлтгэсэн байруудад нүүлгэн шилжүүлэн эмнэлгийн тусламж үйлчилгээ үзүүлж байгаа юм байна.
