Ухань хот. 2020.04.08-ний өглөө

Хятад улсад гарсан Covid-19 халдварын голомт болж байсан Хубэй мужийн төв Ухань хот өчигдөр өглөөнөөс хөл хориогоо бүрмөсөн цуцалж, хотын иргэд улс дотроо төмөр зам, агаараар зорчих боломжтой болсон билээ. Арван сая гаруй иргэнтэй Ухань хотын 50 гаруй мянган иргэн шинэ коронавирусын халдвараар өвчилж, 2 гаруй иргэн амь насаа алдсан билээ.

Харин сүүлийн өдрүүдэд Ухань хотод шинээр халдвар гараагүй тул 76 хоног үргэлжилсэн хөл хориог өчигдөр цуцалж, 60 гаруй мянган иргэн хотоо орхин гарч явсан байна. Хэдийгээр нийтийн тээврийн үйлчилгээ, үйлчилгээний байгууллагууд ердийн хуваариар ажиллаж эхэлсэн боловч хотын эрх баригчдын зүгээс иргэддээ амны хаалтаа байнга зүүж, сонор сэрэмжээ алдахгүй байх, онцын шаардлагагүй бол хотоос гарч явахгүй байхыг анхааруулсаар байгаа юм.

Гэвч Ухань хотод хөл хорио цуцлагдсантай зэрэгцэн өөр бусад хотуудыг тусгаарлах ажиллагаа хийгдсээр байна. Хятад улс ОХУ-тай хил залгаа хуурай газрын боомтуудаа хааж, зүүн хойд Хэйлунжянь мужийн Сүйфенхэ хотыг “Ухань маягаар” тусгаарлаж байгаагаа өчигдөр /лхагва гаригт/ зарлажээ.

Мягмар гаригт Оросын талаас нэвтэрсэн хүмүүсийн дундаас шинэ коронавирусийн халдварын 25 тохиолдол илэрсэн нь ийнхүү шуурхай арга хэмжээ авахад хүргэсэн байна. Шинэ тохиолдлууд бүгд Хятадын Сүйфенхэ болон Оросын Пограничный хотуудыг холбосон хилийн нэвтрэх хэсгээс илэрсэн тухай China Daily мэдээлжээ.

Үүний дараа буюу лхагва гаригийн өглөөнөөс эхлэн Сүйфенхэ хот руу орох, хотоос гарах хөдөлгөөнийг хааж, хөл хорио тогтоон гадаад ертөнцөөс тусгаарлажээ.

Тус хотын айл өрхүүдээс сонгогдсон зөвхөн нэг хүн гурав хоног тутамд нэг удаа гадагш гарч, хоол хүнс, ойр зуурын бараа материал худалдаж авах эрхтэй. Зургаадугаар сарын 1 хүртэл үргэлжлэх энэ хориг нь коронавирусийн тахлын анхны голомт болсон Ухань хотод тогтоож байсан дэглэмтэй ижил байгаа аж.

Хятад улс дотооддоо тархсан халдварыг амжилттай тогтоон барьж чадсан ч сүүлийн үед гадаад орнуудаас зөөвөрлөгдөн ирэх халдварын тоо нэмэгдэж байгаа нь санаа зовинох асуудал болоод байна.