Улсын онцгой комиссын шийдвэрээр дөрөвдүгээр сарын 2-нд Улаанбаатар-Сөүл-Улаанбаатар, дөрөвдүгээр сарын 3-нд Улаанбаатар-Токио-Улаанбаатар чиглэлд тусгай нислэг үйлдэж, монгол иргэдээ авчрахаар болсон. 

Мөн эх орондоо ирэх иргэдийг тус тусад нь буюу нэг өрөөнд нэг хүн байлгах зарчмаар тусгаарлахаар болсон юм. Ингэснээр байрны хүрэлцээнд хүндрэл үүсэхээр байгаа юм. Одоогийн байдлаар улсын хэмжээнд 2516 хүн тусгаарлах байранд байгаа аж.

Энэ талаар УОК-ын Шуурхай штабын дарга Б.Ууганбаяр: "Нэг өрөөнд нэг хүн байлгах зарчмын дагуу одоогоор 360 орчим хүнийг хүлээн авах боломж бидэнд байна. Өнөөдөр 10:00 цагт томоохон зочид буудлуудын захирлуудтай уулзан саналаа хэлж, дэмжихийг хүссэн байгаа. Өнөөдөр хариугаа өгөх ёстой. Үүний дараагаар хууль тогтоомжийн хүрээнд нийслэлийн Засаг дарга захирамж гарган зарим томоохон зочид буудлуудыг дайчлахаар болсон" гэв. 

Мөн тэрээр үргэлжлүүлэн "Сүүлийн таван өдрийн байдлаар тусгаарлалтын 14 хоног нь дууссан 150 орчим иргэн тусгаарлах байрнаас гарсан. Эдгээр иргэн гэрээр дэглэм сахиж, өөрийгөө тусгаарлах үүрэгтэй. Гэтэл Сэлэнгээс ирж, Улаанбаатарт тусгаарлагдсан нэг иргэн тусгаарлалтаас гарахдаа гэртээ 2-3 хоног архидан согтуурсан байсан. 

Энэ хүнд холбогдох арга хэмжээг хатуу авна. Хууль тогтоомжийн хэрэгжилтийг хангуулна. Тусгаарлах байрнаас гараад гэртээ байх хугацаа маш чухал, дэглэмээ сайтар сахих ёстой. Одоо бол хамгийн чухал үе.

Өөрийгөө гэртээ тусгаарлах ёстой иргэдийн үүдэнд наалт наахаар бэлдсэн ч хүний эрхийг хүндэтгэн үзэж байгаа" гэсэн юм.