Увс аймгийн “Дэглий цагаан” нисэх буудал болон ОХУ-ын Бүгд Найрамдах Тува Улсын “Кызыл” нисэх буудлыг холбосон шинэ агаарын замыг гуравдугаар сарын 26-ны өдөр нээсэн байна.

Шинэ агаарын хаалгыг “RIPEK” хэмээн нэрлэж, “Дэглий цагаан”, “Кызыл” нисэх буудал хооронд шууд нислэг үйлдэх томилгоог агаарын тээвэрлэгч “Хүннү Эйр” ХХК авчээ.

“Дэглий цагаан”, Кызыл” нисэх буудлын хооронд шинэ агаарын хаалгаар шууд нислэг үйлдсэнээр нислэгийн хугацаа багасx, шатахуун хэмнэн зорчигчдод хямд үнээр үйлчилгээ үзүүлэх нөхцөл бүрдэхийн зэрэгцээ хоёр орны хамтын ажиллагаа, хөрөнгө оруулалт, худалдаа, соёлын солилцоо, аялал жуулчлалыг хөгжүүлэх чухал ач холбогдолтой юм.

Өнгөрсөн оны аравдугаар сард ОХУ-ын Тээврийн яамны Агаарын тээврийн холбооны агентлагаас Тува Улсын нийслэл Кызыл хотын “Кызыл” нисэх буудлыг олон улсын статустай болгосон ба Монгол Улсын Увс аймгийн “Дэглий цагаан” нисэх буудалтай холбосон шулуун агаарын зам нээх, улсын хил дээр шинэ агаарын хаалга тогтоох хүсэлтийг ИНЕГ-т хүргүүлсэн байна.

ИНЕГ-аас Олон улсын иргэний нисэхийн байгууллагын тавьж буй стандарт шаардлага, зөвлөмжүүдийг хэрэгжүүлэх, хөрш зэргэлдээ орнуудтай хамтран агаарын зайн зохион байгуулалтыг шинэчлэх, агаарын тээвэрлэгч нарын хүсэлтийг судлан, Монгол Улсын агаарын зайд иргэний нисэхийн зориулалтаар ашиглах агаарын зай, агаарын хаалга болон агаарын замуудад өөрчлөлт оруулах, шинээр тогтоох ажлуудыг шуурхай шийдвэрлэж байна.

Монгол Улсын агаарын зайд нэгдсэн хяналт, дүн шинжилгээ хийсэн судалгаа, тайлан болон аюулгүй ажиллагааны эрсдэлийн үнэлгээнд үндэслэн энэхүү агаарын хаалга болон агаарын замыг шинээр тогтоож, Монгол Улсын Агаарын зайг нисэхэд ашиглах тухай хууль, Иргэний нисэхийн тухай хуульд заасны дагуу Зам тээврийн хөгжлийн сайдын 2020 оны нэгдүгээр сарын 6-ны өдрийн тушаалаар баталжээ.

Эх сурвалж: ИНЕГ