ЭМЯ-наас коронавирусийн нөхцөл байдал, Монгол улсын тусламж үйлчилгээ болон хэрэгжүүлж буй арга хэмжээний талаар мэдээлэл хийлээ.
Эмнэлгийн тусламжийн газрын дарга Я.Буянжаргал: "УОК-ын шийдвэрээр иргэдийг нэмж тусгаарлах байруудыг бэлэн болгож байна. Хэрвээ Баянхангай, Баянбайгаль, Батсүмбэрийн амралтуудад иргэдийг тусгаарлахаар болбол тэнд ажиллах эмч, эмнэлгийн ажилтнуудыг бэлдсэн байгаа.
Түүнчлэн өчигдөр УОК-ын хурлаар тусгаарлах хугацааг 21 болгож сунгасан бөгөөд ганц, ганцаар нь тусгаарлах нөхцөлийг бүрдүүлэхээр шийдвэрлэсэн.
Мөн тусгай үүргийн онгоцоор ирэх иргэдэд хатуу шаардлага тавихаар болсон.
Үүнд:
-
Иргэдийг тухайн улс орондоо коронавирусийн шинжилгээнд хамруулж, сөрөг тохиолдолд онгоцонд суулгах;
-
Ямар нэгэн халдварын шинж тэмдэг илэрсэн иргэнийг онгоцонд суулгахгүй;
-
Бүх хүн амны хаалт, бээлийтэй байх;
-
Онгоцонд сууснаас хойш зорчигчид аль болох хоорондоо ярихгүй байх;
-
Онгоцоор ирэх иргэдийн халууныг хоёр цаг тутамд шалгах;
-
Сэжигтэй тохиолдол гарвал онгоцны арын суудал руу тусгаарлах;
-
Онгоц газардахаас өмнө холбогдох байгууллагад бүх мэдээллийг өгөхөөр болсон.
Бид тусгай үүргийн онгоцонд явах эмч, эмнэлгийн мэргэжилтнүүд болон түргэвчилсэн оношлуурын бэлэн байдлыг ханган ажиллаж байна" гэлээ.
ДЭМБ-аас гаргасан сэжигтэй тохиолдлын тодорхойлолтод өөрчлөлт орсон бөгөөд шинж тэмдэг илрэхээс хоёр хоногийн өмнө, шинж тэмдэг илэрснээс хойш 14 хоног буюу нийт 16 хоногийн хугацаанд өвчтэй хүнтэй нэг метрийн зайд харьцсан хүнийг сэжигтэй тохиолдол гэж үзэж байгаа аж.
Мөн энэ халдварын нууц үеийн хугацааг 14 хоног гэж үзэж байсан бол судалгаагаар нууц үеийн хугацаа 21-28 хоног байх магадлалтай болжээ. Иймд иргэдийн тусгаарлан ажиглах хугацааг сунгасан байна.
Мөн зайлшгүй шаардлагтай 5000 орыг 7 үе шаттайгаар УБ хотыг тойроод эмнэлэг, сувилалал, амралтын газруудад бэлдсэн байгаа бөгөөд шаардлага гарвал АШУҮИС-ийн 6-р дамжааны оюутнуудыг дайчилхаар болжээ.
Одоогоор 1842 дадлагажигч эмчийг бэлдэж, бэлэн байдалд байлгаж байгаа аж.
Дэлхийн улс орнуудад цар тахлын хэмжээ идэвхжиж байгаа тул Эрүүл мэндийн яамнаас уриалга гаргаад байна.
Уриалгад:
-
Худалдаа үйлчилгээний газрууд, үйлчлүүлэгч нарыг 2 метрээс багагүй зайнд зогсоох;
-
Зайны тэмдэглгээг байрлуулах;
-
Гар халдваргүйжүүлэгчийг байрлуулах;
-
Хүний бөөгнөрөл үүсгэхгүй байх;
-
Гараас гарт буюу бэлэн мөнгөний үйлчилгээнээс татгалзах;
-
Үйлчилгээнүүдийг цахимжуулах зөвлөмж, уриалга гаргажээ.
Мөн 2 цаг тутамд хүн ихээр хүрдэг газруудад ариутгал, халдваргүйжүүлэлт хийж байхыг зөвлөлөө.
Нэгдсэн Үндэсний байгууллагаас коронавирусийн халдварын тархалтаас ядуу буурай орнуудад учрах эрсдэлийг бууруулах зорилгоор 2 тэрбум ам.долларын төсөвтэй хүмүүнлэгийн арга хэмжээг эхлүүлж байгаа юм байна.