Испанийн алдарт дуурийн дуучин Пласидо Доминго шинэ коронавирусийн халдвар авсан гэдгээ өөрийн сошил хуудсаараа дамжуулан өнгөрсөн ням гаригт мэдэгджээ.
Тэрээр “Би ёс суртахууны үүргээ ухамсарлаж, халдвар авсан тухайгаа та бүхэнд мэдээлж байна. Манай гэр бүлийнхэн ч мөн өөрсдийгөө тусгаарласан байгаа.
Бид бүгд хүчээ нэгтгэн энэ вирустэй тэмцэж, дэлхий дахинд үүсээд буй хямралыг зогсоож чадна. Тиймээс нөхцөл байдал тун удахгүй хэвийн болно гэдэгт итгэх хэрэгтэй” гэж бичжээ.
Пласидо Домингогийн биеийн байдал одоогийн байдлаар тогтвортой байгаа бөгөөд халуурч, ханиах шинж тэмдэг илэрсний дараа шинжилгээ өгсөн байна.
Өдгөө 79 настай Испанийн тенор гараа тогтмол угааж, Засгийн газрынхаа боловсруулсан дүрэм журмыг дагаж мөрдөхийг иргэддээ уриалжээ.
Коронавирусийн халдвар авсан дэлхийн танил одуудаас өмнө нь Идрис Эльба, Том Хэнкс, Кевин Дюрант, Даниэль Дэ Ким тэргүүтэй хүмүүс мэдэгдээд байгаа билээ.