АНУ-ын Ерөнхийлөгч Дональд Трамп шинэ төрлийн коронавирусийн тархалттай тэмцэх зорилгоор өчигдөр буюу баасан гаригт улсын хэмжээнд онцгой байдал зарлалаа.
Тэрээр “Улсын хэмжээнд онцгой байдал тогтоосныг би өнөөдөр албан ёсоор мэдэгдэж байна. Энэхүү арга хэмжээ нь муж улсууд болон орон нутгуудын засаг захиргаанд коронавирусийн тархалттай тэмцэхэд үйл ажиллагаагаа илүү сайн зохицуулах боломж олгоно" гэжээ.
Түүний зарлиг нь одоо байгаа зарим хууль тогтоомжоор хязгаарлагдахгүй өргөн эрх мэдлийг Эрүүл мэндийн сайдад олгох бөгөөд эрүүл мэндийн байгууллагууд шинэ эмнэлэг нээх, эмчилгээний шинэ аргыг туршиж үзэх зэрэг илүү уян хатан, хурдан ажиллах боломжтой болох аж.
Түүнчлэн муж улсуудын эрх баригчдад орон нутгийн засаг захиргааны байгууллагуудтай үйл ажиллагаагаа илүү үр дүнтэй зохицуулах боломжийг бүрдүүлэх юм байна.
АНУ-д онцгой байдалд зориулан гамшгийн эсрэг үндэсний сангаас цар тахалтай тэмцэхэд 50 тэрбум ам.долларыг гаргахаар болжээ.
Одоогийн байдлаар тус улсад “Covid-19” халдварын 2033 тохиолдол бүртгэгдэж, 47 хүн нас бараад байна.
АНУ-ын зарим муж улсад сургуулиудыг хааж, томоохон цугларалт, спортын томоохон арга хэмжээ зохион байгуулахыг хориглон коронавирусийн халдварын тархалтыг хумих арга хэмжээг эхлээд байгаа билээ.
