Сүүлийн 24 цагийн байдлаар Хятад улсад коронавирусийн халдварын 40 шинэ тохиолдол бүртгэгдэж, 22 хүн нас баржээ. 

Тус улсад халдвар авсан хүний тоо буурч байна гэж Хятадын эрүүл мэндийн хороо мэдээлжээ. 

Одоогийн байдлаар зөвхөн Хятад улсад халдвар авсан хүний тоо 80735 хүрч, 3119 хүн нас барж, 58600 хүн эдгэрэн эмнэлгээс гарсан байна. 

Харин Итали улсад халдвараар нас барсан хүний тоо нэг хоногийн дотор 133 нэмэгдэж, нийт 366-д хүрчээ. Халдвар авсан хүний тоо сүүлийн 24 цагийн дотор 25 хувиар нэмэгдэж, нийт 7375 тохиолдол бүртгэгджээ.

Итали улсын эрх баригчид халдвар дэгдээд буй Умард хэсгийн мужуудад хөл хорио тогтоож, орох гарах хөдөлгөөнийг хязгаарласан байна. 

Италийн хөл хорио тогтоосон 14 мужуудад спортын бүх тэмцээнийг үзэгчгүй зохион байгуулахаар болж, дөрөвдүгээр сарын 3-ныг хүртэл хөл хориог сунгажээ.

Тус улсын хөл хорио тогтоосон мужуудад жуулчдын ихээр очдог Милан, Венеци зэрэг хотууд багтжээ.

Мөн бүхий л үйлчилгээний газруудын үйл ажиллагааг хязгаарласан бөгөөд иргэдэд аль болох гэртээ байх шаардлага тавьж, хөл хорионы дэглэмийг зөрчвөл гурван сар хоригдох шийтгэл хүлээлгэхээр болжээ.

Өнөөдрийн 10 цагийн байдлаар коронавирусийн халдвар дэлхийн 83 орон илэрч, 109965 хүн халдвар авч, халдварын улмаас 3824 хүн нас бараад байна.

Итали улсад халдварын дэгтэлд огцом нэмэгдэж, халдварын тохиолдлоор Хятад улсын дараа эрэмблэгдлээ. 

Харин Өмнөд Солонгост халдвар авсан хүний тоо 7313 хүрч, өнөөдөр 51 дэх нас бараад байна. 

АНУ-д 547 халдварын тохиолдол бүртгэгдэж, 21 хүн нас баржээ.