Өнөөдөр буюу баасан гаригийн өглөөний 10 цагийн байдлаар БНХАУ-д коронавирусийн халдварын 143 шинэ тохиолдол илэрч, 30 хүн нас барсан бол 1681 хүн эдгэрч эмнэлгээс гарчээ. Ийнхүү тус улсад халдвар авсан нийт хүний тоо 80552 болсон байна.
Харин АНУ-д коронавирусийн халдварын 53 шинэ тохиолдол бүртгэгдэж, 12 дахь өвчтөн нь нас баржээ.
Шинэ тохиолдлууд Колорадо, Теннеси, Техас мужуудад ирэлсэн бол Сан Франциско хотод анхны тохиолдол бүртгэгдлээ.
Мөн Их Британи улсад Covid-19 вирусийн халдвараар анхны өвчтөн нь нас барж, халдварын тохиолдол 115-д хүрсэн байна.
Хятадын Эрүүл мэндийн хорооны мэдээллээр халдвар авсан хүмүүстэй ойрын хавьталтай 670854 хүн байгаа бөгөөд тэдний 29896 нь эмнэлгийн хяналтад байгаа аж.
Халдварын тохиолдол эрчимтэй нэмэгдэж байгаа Иран улсад халдварын тархалтыг хязгаарлах зорилгоор хот хоорондын зорчих хөдөлгөөнийг хязгаарласан байна. Тус улсад халдварын улмаас нас барсан хүний тоо 107 болсон байна.
Сүүлийн 24 цагийн дотор халдварын 591 шинэ тохиолдол бүртгэгдсэнээр халдвар авсан хүний тоо 3513 болжээ.
Мөн тус улсад сургууль, цэцэрлэгийн үйл ажиллагааг дөрөвдүгээр сар хүртэл түр зогсоожээ.
Одоогийн байдлаар дэлхий дахинд шинэ коронавирусийн халдвар авсан хүмүүсийн тоо 98000 давж, халдварын улмаас 3385 нас барж, 55631 хүн эдгэжээ. Дэлхийн 89 улсад бүртгэгдээд байна.
