Дэлхий нийтэд тархаад буй коронавирусийн халдвар авсан иргэдийн тоо БНСУ-д нэг өдрийн дотор 52 тоогоор нэмэгдлээ. Ингэснээр тус улсад халдвар авсан хүний тоо нийт 156 боллоо.

Шинээр илэрсэн 52 тохиолдлын 38 нь Тэгү хотод бүртгэгдсэн байна. Эдгээр хүмүүс өмнө нь "Covid-19" вирусээр өвчилсөн нь тогтоогдсон ба 61 настай эмэгтэйтэй хамт тус хотын Шинчонжи шашны урсгалын сүмд явдаг байжээ.

Халдвар тархахаас өмнө 61 настай уг эмэгтэйгээс эмч коронавирусийн шинжилгээ авахыг хэд хэдэн удаа хүссэн ч өгөөгүй байна. Үүнээс үүдэн халдвар хурдацтай тархжээ. Өмнөд Солонгосоос илэрсэн 31 дэх халдвар тээгч болох уг эмэгтэй нь Хятадад зорчиж байгаагүй, халдварыг ямар замаар авсан нь тодорхойгүй байна.

Мөн тус шашны цуглаанд оролцсон 1000 гаруй хүнийг шинжилгээнд хамруулаад байгаа аж. 

Эрх баригчид тархалтын голомт болоод байгаа Тэгү хотыг Хятадын Уханьтай адил тусгаарлан хөл хорио тогтоох арга хэмжээг авч ажиллаж байна. 

Өмнөд Солонгост коронавирусийн халдвараар 1 хүн нас барсан бол 16 хүн бүрэн эдгэрч, 139 хүн эмчилгээ хийлгэн эмнэлэгт хэвтэж байгаа аж.

Эрүүл мэндийн яамны өнөөдрийн мэдээллээр /2020.02.21/ БНСУ-ын Тэгү хотоос Бусан-Улаанбаатарын онгоцоор өчигдөр орой ирсэн зургаан оюутныг ХӨСҮТ-д тусгаарлаж, ажиглалтад авсан тухай мэдээллэв. 

ХӨСҮТ-ийн Тандалт судалгааны албаны дарга А.Амбасэлмаа: "Тэгү хотод коронавирусийн халдварын 80 хувь нь бүртгэгдсэн байгаа тул бүх шатны сургуулиудаа хаасан байна. Тус хотод монгол оюутнууд олноор сурдаг. Эх орондоо ирсэн оюунуудаас халдварын ямар нэг шинж тэмдэг илрээгүй ч өвчлөл гарсан улсаас ирж байгаа тул хяналтанд оруулсан. Шинжилгээний хариу гараагүй байгаа. Мөн Завхан аймагт нэг сэжигтэй тохиолдлыг тусгаарласан" гэлээ.