Шинэ коронавирусийн халдвараас урьдчилан сэргийлж улс даяар хэсэгчилсэн өндөржүүлсэн бэлэн байдалд шилжсэн. Үүнтэй холбоотойгоор зарим аймаг орох, гарах хөдөлгөөнийг хязгаарлах шийдвэр гаргаад байгаа билээ.
Харин Батлан хамгаалахын сайд Н.Энхболд: "Хот хоорондын хөдөлгөөнийг зарим аймаг хаасан шийдвэр гаргасан байна. Аймгийн засаг дарга нарт дангаараа ийм эрх байхгүй. ЗТЯ-ны сайдтай ярилцаж байж гаргах ёстой байдаг. Үүнийг бид судална. Хот хоорондын хөдөлгөөнийг хаах асуудлыг нөхцөл байдлыг дүгнэж байж шийдвэрлэнэ" гэсэн юм.
Энэ талаар ЗТХ-ийн сайд Б.Энх-Амгалан: "Онцгой үед аймгийн Засаг дарга нар замын хөдөлгөөнийг хязгаарлах боломжтой. Яагаад гэвэл коронавирусийг ханиад биш тахал гэж үзэж буй.
Орон нутгийн замын хөдөлгөөнийг хязгаарлах шаардлагатай талаар Засгийн газрын хурлаар ярьж байна. Эцсийн шийдвэрийг маргааш Улсын Онцгой комисс гаргана. Хэрэв Онцгой комисс хөдөлгөөн хязгаарлах шаардлагатай гэж үзэн шийдвэр гаргавал тухайн аймгуудын Засаг дарга нарын захирамж хэрэгжээд явна. Харин УОК хөдөлгөөн хязгаарлах шаардлагагүй гэж үзвэл Засаг дарга нарын захирамж хэрэгжихгүй" гэлээ.
