Нийгмийн сүлжээ болон хувийн чатаар ирж байгаа “ҮАБЗ-өөс дайны бэлэн байдалд шилжих шийдвэр гаргасан байна. Нийслэлийн онцгой байдал нууцаар хуралдсан. Хөвсгөлд нэг хүн коронавирусийн халдвар авсан батлагдсан” гэх дуут мессеж мэдээлэл нь худал гэдгийг ЭМЯ-наас мэдэгдсэн.
Манай улсад 2020 оны 2 дугаар сарын 12-ний байдлаар Шинэ коронавирусийн /СOVID-19/ халдвар бүртгэгдээгүй!
Зохион байгуулалтайгаар худал ташаа мэдээлэл тарааж, нийгмийг айдаст автуулах, эмх замбараагүй байдал бий болгохыг хүсч буй нийгмийн сүлжээний хэрэглэгчийг хуулийн байгууллагад хандан шалгуулж, хариуцлага тооцно гэж мэдээлсэн.
Энэ талаар өнөөдөр ЭМЯ-ны ээлжит мэдээллийн үеэр Цагдаагийн ерөнхий газрын Нийтийн хэв журам хамгаалах олон нийтийн аюулгүй байдлыг хангах албаны дарга, цагдаагийн дэд хурандаа П.Эрдэнэбат: "Цахим орчинд худал мэдээлэл тараах, иргэдийг төөрөгдүүлэх явдал их гарч байна. Энэ дуут мессэжийг тараасан Чингэлтэй дүүргийн иргэн Г-г тогтоогоод шалгаж байна.
Мөн үүнийг нь цахим орчинд худал мэдээлэл иргэнийг ерөнхийдөө хаягаар нь илрүүлж байна. Худал мэдээлэл тараасан иргэнийг Зөрчлийн хуулиар 2 сая төгрөг, ААН-ийг 20 сая төгрөгөөр торгох хуулийн заалттай. Коронавирустай холбоотой худал мэдээ тараасан 10 иргэнд эрүүгийн хэрэг үүсгэн шалгаж байна" гэлээ.
