УИХ өчигдөр дахиад л хууль зөрчлөө. Н.Номтойбаярын чөлөөлөгдөх хүсэлтийг Төрийн байгуулалтын байнгын хороо дэмжсэн чинь нэгдсэн чуулган дээр бүрэн эрхийг нь түдгэлзүүлсэн шийдвэр гаргачихлаа. Нэгдсэн чуулган нэг асуудлаар хоёр удаа санал хураалгав. Дахиад унасан бол дахиад ч санал хураах байсан гэдэгт итгэлтэй байна.

Өчигдөр үдээс хойших чуулган хаалттай хуралдаж, Н.Номтойбаяр гишүүний бүрэн эрхийг түдгэлзүүлэх шаардлагагүй гэж үзсэн Хууль зүй, Төрийн байгуулалтын байнгын хорооны дүгнэлтийг хэлэлцсэн билээ. Нууц санал хураалтаар хоёр саналын илүүгээр Н.Номтойбаярыг бүрэн эрхийг түдгэлзүүлэх шаардлагатай гэж үзсэн авч, түдгэлзүүлэх тухай УИХ-ын тогтоолыг батлах болсон чинь олонхи нь эсрэг санал өгөв. Тогтоолын төслийг батлахдаа ил санал хураалт явуулснаас болсон байж магадгүй.

Үүнээс болж МАН-ын бүлэг чуулганаас завсарлага авч, харин Н.Номтойбаяр УИХ-ын гишүүнээс чөлөөлөгдөх хүсэлтээ өгсөн.

Нэгэнт түдгэлзүүлэх асуудлаар УИХ-ын шийдвэр гарчихсан  (дэмжээгүй л гэж үзнэ л дээ) учраас Н.Номтойбаярын чөлөөлөгдөх хүсэлтийг УИХ хэлэлцэхээс өөр замгүй байв. Энэ ч утгаараа Төрийн байгуулалтын байнгын хороо хэлэлцээд, дэмжээд чуулган дээр оруулаад ирсэн чинь Ц.Нямдорж “Тэгж хэлэлцдэггүй, ингэж хэлэлцдэг” гээд дахиад бүрэн эрхийг нь түдгэлзүүлэхээр санал хураалгачихаж байгаа юм. Халдашгүй байдлын дэд хорооны дарга гэдэг уг нь тийм яахаа алдсан том амьтан биш. Яаж ингэж дахин дахин хууль зөрчөөд байдгийг нь ойлгох арга алга.

Бодвол мэдээж Н.Номтойбаярын нүүр лүү харж байгаад “Шалгуулчихаад эргээд ороод ир. Боломж нь байна” энэ тэр гэсэн л байх. Гэхдээ манай хуулийн байгууллагуудын байж байгаа байдлыг харвал ирэх сонгууль болтол Н.Номтойбаярын хэргийг шийдэхгүй. Тэр байтугай ирэх сонгуульд ч нэр дэвшүүлэхгүй. "Яллагдагчаар татчихсан" гээд гэдийгээд суучихна. Тийм ч учраас Н.Номтойбаяр өчигдөр, эхний санал хураалтын дараа “улс төрөөс түр хугацаанд завсарлага авах шаардлагатай боллоо” гэж мэдэгдсэн хэрэг.

МАН-ын бүлэг чуулганаас завсарлага авчихаар “дахиж оруулж ирэх нь тодорхой юм байна” гэж үзээд, түүнээс нь өмнө өрсөж чөлөөлөгдөх хүсэлтээ өгсөн хэрэг. Бүлгийн дарга Д.Тогтохсүрэн ч гэсэн “Чөлөөлөгдөх хүсэлтээ өгвөл УИХ хэлэлцэхээс өөр замгүй” гэж мэдэгдсэн. Тэгсэн хэрнээ “Түдгэлзүүлэх асуудлаар УИХ-ын шийдвэр гарсан. Тогтоолыг баталсан батлаагүй нь хамаагүй” гэж зүтгэсэн. Хоёр үзүүртэй зүү юмаа, нээрээ. Морь унасан толгойгүй хүн...

Энд Ц.Нямдорж сайдын шударга ба шударга бусын талаар огт яриагүй. Н.Номтойбаярын бүрэн эрхийг түдгэлзүүлэх нь зөв, буруугийн тухай ч хөндөөгүй. Зүгээр УИХ нэг асуудлаар хоёр өөр шийдвэр гаргаж болдог юм уу? л гэж  байгаа хэрэг.

Б.ЗАЯА