Хурдтай тархаж буй шинэ төрлийн “2019-nCoV” коронавирусын халдвараар өнөөдрийн байдлаар нийт 849 өвчилсөн тохиолдол бүртгэгдэж, 26 хүн нас барж, 177 хүний биеийн байдал хүнд байна.
Түүнчлэн уг вирусын халдвар авсан байж болзошгүй 1072 сэжигтэй тохиолдол бүртгэгдээд байгаа бөгөөд 34 хүний биеийн байдал сайжирч эмнэлгээс гарсныг БНХАУ-ын үндэсний эрүүл мэндийн хороо мэдэгджээ.
Мөн тус вирусээр үүсгэгдсэн уушгины хатгалгаа өвчний хоёр тохиолдол БНСУ-д бүртгэгдсэн байна. Энэ тухай тус улсын Үндэсний өвчний хяналт, урьдчилан сэргийлэх төв мэдэгдлээ.
БНХАУ-аас Сөүл хотын Кимпо нисэх онгоцны буудалд хүрэлцэн ирсэн 55 настай БНСУ-ын иргэн коронавирусын халдвар дэгдэж эхэлсэн Ухань хотод зорчсон байна. Өвчтөнийг тусгаарлан, эмчилгээ хийж байгаа аж.
Хятадын нийт 31 мужид тус халдварын тохиолдол бүртгэгдээд байгаа ба нас барагсдын ихэнх нь вирусийн голомт болсон Ухань хот, Хубэй мужид байна. Мөн Бээжин хоттой залгаа Хэбэй мужид нэг, зүүн хойд Хятадын Хэйлунзянь /Манжуур/ мужид нэг хүн нас баржээ.
Одоогоор Хубэй муж, Ухань хотод эрүүл мэндийн нэгдүгээр зэргийн онц байдал зарлаж, гадагш чиглэлтэй зорчигч тээврийн урсгалыг хориглосон байна.
