Сүүлд мэдээлэгдсэнээр шинэ төрлийн коронавирусийн халдвар авсан хүмүүсийн тоо 552 хүрч, амиа алдсан хүний тоо 17 болоод байна.
Тэдгээрээс Тайландад 4, Хонг Конгт 2, Макао, Тайвань, Өмнөд Солонгос, Япон, АНУ-д тус тус нэг халдвар илрээд байгаа юм. Бусад нь бүгд эх газрын Хятадад буюу дийлэнх нь Үхань хотод илэрчээ.
Үүний улмаас Олон улсын олимпийн хороо Уханьд болох олимпын эрх олгох боксын тэмцээнийг цуцалсан байна. “Токио 2020” зуны XXXII олимпын наадмын боксын тэмцээнийг ОУОХ-ноос зохион байгуулж байгаа бөгөөд Ази, Номхон далайн бүсийн олимпын эрхийн тэмцээн хоёрдугаар сарын 3-14-нд Хятадын Ухань хотноо болох байв.
Мөн Үхань хотоос гарах чиглэлийн нийтийн тээврийн үйлчилгээ болон нисэх буудал, төмөр замын буудлуудын үйл ажиллагааг түр хугацаагаар зогсоожээ.
Өнөөдөр өглөөний 10 цагаас эхлэн хотоос гарах чиглэлийн автобус, метро, гаталга онгоц, хот хоорондын тээврийн автобусны үйлчилгээг зогсоосон байна. "Уушгины хатгалгаа өвчнийг үүсгэж буй коронавирусний халдварын тархалтыг зогсоож, ард иргэдийн эрүүл мэнд, аюулгүй байдлыг баталгаажуулах зорилгоор эдгээр арга хэмжээг хэрэгжүүлж байна" гэж хотын захиргаа мэдэгджээ. Тээврийн хориг хэзээ цуцлагдах талаар мэдээлээгүй байна.
Ухань хот нь Хятадын төмөр замын гол дөрвөн зангилааны нэг болдог. Хувийн машинтай иргэдэд хориг тогтоогоогүй ч “онц шаардлагагүй бол хотоос гарахгүй байх”-ыг анхааруулжээ. Нийт 11 сая оршин суугчтай Ухань хот нь Лондон, Нью Йоркоос ч том хот юм. Өчигдөр орой нийтийн тээврийн хориг зарлагдсаны дараа өглөөний 10 цагаас өмнө амжиж хотоос гарах гэсэн иргэд төмөр замын өртөө, нисэх онгоцны буудлуудыг дүүргэсэн байна.
Өчигдөр Швейцарийн Женев хотод хуралдсан Дэлхийн Эрүүл Мэндийн Байгууллагын (ДЭМБ) шуурхай зөвлөл шинэ коронавирусийн халдварын улмаас олон улсад онц байдал зарлах эсэхийг шийдэх байсан юм. Зөвлөлийн гишүүд Ухань хотод тогтоосон нийтийн тээврийн хориг, өвчтөнүүдийн биеийн нөхцөл байдлын талаар Хятадын талаас дэлгэрэнгүй мэдээлэл авсны дараа эцсийн шийдвэрийг өнөөдөр буюу пүрэв гаригт гаргах юм байна.
Эх сурвалж: Xinhua, Reuters, AFP
