Австралид өнөөдрийг хүртэл асч байгаа ойн түймрийг тавьсан байж болзошгүй 200 орчим хүнийг Шинэ Өмнөд Уэльсийн цагдаагийн ажилтнууд баривчиллаа хэмээн lentachel.ru/news/ хэвлэл мэдээлжээ. Ойн түймэртэй холбоотой нийт 205 зөрчилд холбогдуулан 183 хүнийг хуулийн хариуцлагад татаад байна. Ойн бүсэд явах үедээ тамхины ишээ хаясан, шүдэнз зурсан зэрэг зөрчил  байгаа ч өнөөдөр асч байгаа гамшиг дагуулсан аймшигт түймэр гарахад нөлөөлсөн гэж үзэж байгаа юм.

Австралид өнөөдрийн байдлаар 170 орчим голомтод түймэр асч нийтдээ долоон сая орчим га талбайг хамраад байна. Түймрийн утаа далай даван Өмнөд Америкт хүрээд байгаа. Түймрийн улмаас амиа алдсан хүний тоо 27 хүрсэн тухай өчигдөр тус улсын Ерөнхий сайд Скотт Моррисон пүрэв гаригт мэдэгдсэн. Мөн маш ховор ургамал, амьтны төрөл зүйл сүйрсээр байна.

Ойрын өдрүүдэд агаарын температур нэмэгдэж, хүчтэй салхи дэгдэх төлөвтэй байгаа, түймэр улам газар авж болзошгүй тул нүүлгэн шилжүүлэх сэрэмжлүүлгүүдийг анхааралтай сонсохыг холбогдох албаны төлөөлөгчид уриалсаар байна. Ойн түймрийн улмаас 2000 гаруй байшин барилга сүйдсэн бөгөөд дээрх тоон үзүүлэлтүүд цаашид улам нэмэгдэх магадлал өндөр байна.

"2019 он Австралийн түүхэнд бүртгэгдсэн хамгийн халуун, хуурай уур амьсгалтай жил байсан" гэж тус улсын Үндэсний цаг уурын агентлаг пүрэв гаригт мэдээлжээ.