УИХ-ын Нийгмийн бодлого, боловсрол, соёл, шинжлэх ухааны байнгын хорооны өнөөдрийн хуралдаанаар Иргэдийн тэтгэвэр барьцаалсан зээлийн төлбөрийг төрөөс нэг удаа төлөх тухай хуулийн төслийг хэлэлцэн дэмжлээ.

Монгол Улсын ҮАБЗ-өөс гаргасан зөвлөмжийн дагуу тэтгэврийн зээлийн өрийг нэг удаа тэглэх, Салхитын мөнгө, алтны ордын орлогоос төрд ногдох өгөөжийг барьцаалан үнэт цаас гаргаж, уг асуудлыг шийдвэрлэх хуулийн төслийг ХНХ-ын яамнаас боловсруулжээ.

Нийгмийн даатгалын сангаас 2019 оны арванхоёрдугаар сарын 31-ний байдлаар 422.9 мянган иргэн тэтгэвэр авч буй аж. Үүний 54.5 хувь буюу 228.6 мянга нь 757.6 тэрбум төгрөгийн зээлийн үлдэгдэлтэй байгаа юм. Тэтгэврээс өөр орлогогүй иргэд тэтгэврийн зээл авч, банкны хүү нэмж төлснөөр ядууралд өртөх, өдөр тутмын хэрэгцээг хангаж чадахгүйд хүрч байна хэмээн ХНХ-ын сайд С.Чинзориг мэдээллээ.

Салхитын мөнгөний орд нь 808.3 тонн мөнгө 1.1 тонн алтны нөөцтэй бөгөөд урьдчилсан тойм тооцооллоор тус ордын цэвэр ашиг 1 их наяд гаруй төгрөг байхаар тооцоолжээ. Хуулийн төслийг дагалдуулан цаашид иргэдийн тэтгэвэр, тэтгэмжийг барьцаалан зээл олгохгүй байхаар Нийгмийн даатгалын сангаас олгох тэтгэвэр, тэтгэмжийн тухай хууль, Ахмад настны тухай хууль, Банк, эрх бүхий хуулийн этгээдийн мөнгөн хадгаламж, төлбөр тооцоо, зээлийн үйл ажиллагааны тухай хуульд нэмэлт, өөрчлөлт оруулах хуулийн төслийг мөн боловсруулсан байна.

Хэлэлцэж буй асуудалтай холбогдуулан асуулт асууж, санал хэлэх гишүүн гараагүй тул Байнгын хорооноос хуулийн төсөл санаачлагчдад зарим чиглэл өглөө. Тухайлбал, тэтгэвэр барьцаалан зээл авсан 229 мянга иргэний 207.8 мянга нь 6 хүртэл сая төгрөгийн зээлтэй байгаа аж. Энэ нь нийт зээл авсан иргэдийн 91.5 хувийг эзэлж буй учир чөлөөлөх хэмжээг 6 сая байх талаар ярилцах шаардлагатай хэмээн тус байнгын хороо үзжээ. Мөн тэтгэврийн зээл аваагүй 192 мянган иргэнд зориулсан арга хэмжээ бодлого хэрэгжүүлэх нь зүйтэй гэсэн байна. Тиймээс иргэдийн зээлийг тэглэх болон зээлгүй ахмадуудад зориулсан бодлогыг цогцоор нь ярилцах ёстой. Түүнчлэн тэтгэвэр барьцаалсан зээлийг цаашид олгохгүй байх бус, 3-6 сараар буюу богино хугацаагаар урьдчилан авч болох эсэх асуудлыг судлан танилцуулахыг үүрэг болголоо.