Туркийн хувийн агаарын тээврийн MNG Jet компани "Ниссан" компанийн гүйцэтгэх захирал асан Карлос Гоныг Японоос оргуулахад нисэх онгоцоо ашиглуулснаа хожим мэджээ. MNG Jet компанийн хоёр нисэх онгоцыг хоёр тусдаа хүн түрээслэн хэрэглэсэн нь үнэндээ Гоныг оргуулах ажиллагаанд ашиглагдсан байжээ.

Хоёр онгоцны нэг нь Дубайгаас Японы Осака хүрээд дараа нь Истанбулд ирсэн бол нөгөө нь Истанбулаас Ливаны нийслэл Бейрут руу ниссэн байна. Гэвч онгоцнуудыг захиалсан хүмүүс нь ашиглаагүй, харин Карлос Гоныг оргуулах ажиллагаанд ашиглагдсан болохыг MNG Jet компанийн удирдлагууд сүүлд мэдсэн байна.

Тус компани одоо Туркийн хуулийнханд шалгуулахаар хандаад байгаа бөгөөд нэг ажилтан нь онгоц захиалгын бичиг баримтыг хуурамчаар үйлдсэн болохыг тогтоосон байна. "MNG Jet компани одоо эрх баригчидтай хамтран ажиллаж, компанийн үйлчилгээг хууль бус үйлдэлд ашигласан хүмүүсийг шалгуулж байна" хэмээн тус компаниас гаргасан мэдэгдэлд өгүүлжээ.

65 настай Карлос Гон нь Японы Ниссан, Мицубиши, Францын Рено автомашин үйлдвэрлэгчдийн бизнесийн бүлэглэлийг олон жил удирдсан бөгөөд түүнийг 2018 оны арваннэгдүгээр сард компанийн өмчийг хувьдаа зарцуулсан, татвараас зугтсан хэрэгт сэжиглэгдэн Токиод баривчилжээ.

Олон сар хорионд байсан Гоныг энэ оны дөрөвдүгээр сараас эхлэн Токио дахь гэрт нь хорьжээ. 24 цагийн камерын хяналтанд байсан Гон энэ долоо хоногийн эхээр Ливаны нийслэлд гэнэт очсон бөгөөд өчигдөр Японы хуулийнхан түүнийг Интерполын сүлжээгээр эрэн сурвалжилж байгаагаа зарласан юм.

Эх сурвалж: The Guardian