Токиод гэрийн хорионд байхдаа оргож, Ливан улсад гараад байгаа "Ниссан" компанийн гүйцэтгэх захирал асан Карлос Гоныг эрэн сурвалжилж, баривчлах мэдэгдлийг Японы эрх баригчид Интерпол сүлжээгээр тараажээ.

Түүнийг Японы "Ниссан", "Мицубиши" компаниуд болон Францын "Рено" компанийн бизнесийн нэгдлийг олон жил удирдахдаа хөрөнгө мөнгө хувьдаа завшиж, татвараас зугтсан хэмээн буруутган шалгаж байсан юм. Ливаны хууль зүйн яам Интеролын мэдэгдлийг хүлээж авснаа өчигдөр мэдэгдсэн байна.

Ливанд ирснийхээ дараа Карлос Гон мэдэгдэл гаргаж, өөрийгөө "Японы шударга бус хуулийн системд барьцаалагдсан байсан тул оргосон" хэмээн тайлбарлаж, энэ талаар сэтгүүлчидтэй уулзана хэмээн мэдэгдсэн билээ.

Мөн тэр өөрийг нь оргуулах ажиллагаанд гэр бүлийнхэн нь оролцоогүй гэдгийг мэдэгдсэн байна. Карлос Гон “Оргох ажиллагааг би дангаараа зохион байгуулсан. Гэр бүлийнхэн маань үүнд ямар ч хамаагүй” гэжээ. Өчигдөр Японы прокурорууд Гоны Токио дахь гэрт нэгжлэг хийсэн байна.

Мөн Турк улс Карлос Гоныг оргуулах ажиллагаанд оролцсон байж болзошгүй хэмээн сэжиглэж, долоон хүнийг саатуулан шалгаж эхэлжээ. Ниссаны экс босс оргохдоо Токиогоос Истанбул, Истанбулаас Бейрут чиглэлд хувийн нисэх онгоцоор аялсан гэж үзэж байгаа юм.

Туркийн эрх баригчид энэ хэрэгт холбоотой байж болзошгүй дөрвөн нисгэгч, нисэх буудлын хоёр ажилтан, хувийн карго компанийн нэг менежэрийг баривчилсан байна. Гэвч Ливаны тал Карлос Гоныг баривчлан Японд хүлээлгэж өгөх магадлал тун бага байна. Учир нь тэр Ливаны эрх баригчидтай ойр холбоотой хүн юм.

Карлос Гоны эцэг эх нь Ливан хүмүүс бөгөөд өөрөө Бразилд төрж, Францад боловсрол олсон хүн ажээ. Тэрээр Францын Michelin, Renault зэрэг компаниудаас ажил хөдөлмөрийн гараагаа эхэлж байсан юм.

Карлос Гон нийтдээ $80 саяын орлогоо татварын албанаас нуусан хэрэгт сэжиглэгдэн 2018 оны арваннэгдүгээр сард Токиод баривчлагдаж байв. Дараа нь түүнийг Ниссан компанийн өмч хөрөнгийг хувьдаа ашигласан хэмээн буруутгасан юм. Олон сар хоригдсоны эцэст тэрээр өнгөрсөн оны дөрөвдүгээр сард нэг тэрбум иений барьцаагаар гэрийн хорионд шилжжээ. Өнгөрсөн долоо хоногийн сүүл хүртэл Гон 24 цагийн камерын хатуу хяналтын дор амьдарч байв.

Эх сурвалж: Reuters