Оросын Ямалын телевиз радиогийн “Ямал-Регион” компанийн сэтгүүлч Алиса Яровскаяг хэвлэлийн бага хурлын үеэр ОХУ-ын Ерөнхийлөгч Владимир Путинаас асуулт асуусных нь төлөө ажлаас нь халлаа хэмээн URA.RU хэвлэл мэдээлсэн байна.
Сэтгүүлч А.Яровская хэвлэлийн хурлын үеэр Ямал дахь Обь мөрөн дээгүүр барьж байгаа гүүрийн барилгын ажил удаашралтай байгаа талаар яриад “Манай амбан захирагч Дмитрий Артюхов энэ төслийг гүйцээхийн тулд бололцоотой бүхнийг хийж байгаа боловч бид энэ талаар тун бага ярьж байна. Тэгэхээр энэ ажлыг холбооны “хүнд артиллертэй” холбож хурдавчлуулж болохгүй юу” гэж асуусан юм байна.
Харин ерөнхийлөгч Путин “Бүс нутгийн амбан захирагч нар бүгд л Засгийн газар, Тээврийн яаманд хандаж ийм санал тавьдаг. Таны ярьж байгаа гүүр бол чухал төсөл. Бид ойлгож байна. Анхаарна” гэсэн утгатай хариу өгчээ.
URA.RU хэвлэлд мэдээлэл өгсөн хүн Яровскийн асуудлыг тойргийн өндөр албаны хүмүүс тааруухан үнэлсэн гээд “Хэвлэлийн бага хурлын дараа тэдэнтэй хамтран ажиллахаа зогсоох шийдвэр гаргасан” гэсэн байна. Өөр нэг эх сурвалж бас “Ямалын засгийн газар амбан захирагчид нэг их таатай биш байна” гэжээ.
Энэ бүхнээс үүдээд сэтгүүлчийг ажлаас нь халсан гэх боловч Алиса Яровская өөрөө “Ямал-регион”-той хөдөлмөрийн гэрээгээ хэдийнээ цуцалсан гээд “Халагдах өргөдлөө би өөрөө өгсөн” гэсэн байна.
"Ардчилал таймс" сонин
