Энэ удаагийн "Чингис хаан" одонг "The Hu" хамтлагт олгохоор болсныг Ерөнхийлөгчийн Тамгын газрын дарга З.Энхболд албан ёсоор зарлалаа.

Их эзэн Чингис хааны мэндэлсэн өдөр буюу өвлийн тэргүүн сарын шинийн 1-нд улс орныхоо тусгаар тогтнол бүрэн эрхт байдал, үндэсний эв нэгдлийг бататган бэхжүүлэх, төрт ёс, түүх соёлынхоо уламжлалыг гүнзгий судалж, хойч үедээ өвлүүлэх, тэдгээрийг дэлхий дахинд сурталчлан таниулах үйлсэд үнэтэй хувь нэмэр оруулж, төр, нийгэм, үндэстний өмнө онцгой гавьяа байгуулсан иргэнд Монгол Улсын Төрийн тэргүүн зэргийн "Чингис хаан" одонг гардуулдаг уламжлал тогтоод байгаа билээ. 

Энэ жилийн өвлийн тэргүүн сарын шинийн 1 арваннэгдүгээр сарын 27-нд тохиож байгаа билээ.

"The Hu" хамтлаг Их Британийн шилдэг 100 жагсаалтад багтсан анхны монгол уран бүтээлч болсноос гадна Биллбоард жагсаалтыг тэргүүлсэн амжилт үзүүлээд байгаа юм. Одоо тэд умард Америкт "The Gereg" аялан тоглолтоо хийж байгаа билээ. Тус хамтлагийг өнгөрсөн наадмын үеэр Монголын үндэсний урлагийг олон улсад амжилттай сурталчилж буй хэмээн үзэж Нийслэлийн дээд шагнал болох “Хангарди одон”-гоор шагнасан.

“The Hu” хамтлаг “Хүннү рок” урсгалаар уран бүтээл туурвидаг, 11 хүний бүхэлдэхүүнтэй.

1. МУГЖ Б.Дашдондог – Үүсгэн байгуулагч, продюсер,

2. Ц.Надмидтулга – Менежер,

3. Брэндон Фрайзен – Менежер,

4. Ц.Галбадрах – Хамтлагийн ахлагч, аянга морин хуур, хархираа хөөмэй,

5. Г.Нямжанцан – Төмөр хуур, цуур, хөөмэй,

6. Б.Энхсайхан – Гал морин хуур, хөөмэй,

7. Н.Тэмүүлэн – Товшуур,

8. Г.Одбаяр – Бөмбөр,

9. А.Жамбалдорж – Соло гитар,

10. Б.Батхүү – Басс гитар,

11. М.Өнөмөнх – Хэнгэрэг гэсэн бүрэлдэхүүнтэй юм байна.

"Чингис хаан" одонг Монгол Улсын анхны Ерөнхийлөгч П.Очирбат, Төрийн шагналт хөгжмийн зохиолч Б.Шарав, Монгол Улсын Ерөнхий сайд асан Д.Бямбасүрэн, УИХ-ын дэд дарга Р.Гончигдорж, Монгол Улсын Ерөнхийлөгч асан Н.Багабанди, УИХ-ын гишүүн Д.Дэмбэрэл, Монгол Улсын 14 дэх Ерөнхий сайд Д.Содном, Нэрт эрдэмтэн, академич Х.Намсрай, Яруу найрагч Г.Мэнд-Ооёо, МУГЖ Г.Ариунбаатар, МУГТ Н.Түвшинбаяр нарт хүртээж байжээ.

"Чингис хаан" одонд нэр дэвшүүлэх, шагнах журамд:

• Одон хүртэгч Монгол Улсын иргэнд тухайн үеийн ханшаар 9 цэн алттай тэнцэх хэмжээний мөнгөн шагнал, гадаадын иргэнд мөн тухайн үеийн ханшаар 9 цэн алттай тэнцэх хэмжээний мөнгөн шагнал эсвэл түүнтэй дүйцэх дурсгалын зүйлийг олгоно.
• “Чингис хаан” одонгоор шагнагдсан Монгол Улсын иргэн “Чингис хаан” одонг гардуулах ёслолын ажиллагаа, Үндэсний их баяр наадам, Үндсэн хуулийн өдөр, Цагаан сарын баярыг тохиолдуулан зохион байгуулах төрийн ёслолын арга хэмжээнд уригдаж байна.
• “Чингис хаан” одонгоор шагнагдсан Монгол Улсын иргэнд Их Эзэн Чингис хааны өдөр буюу Их Эзэн Чингис хаан мэндэлсэн билгийн тооллын өвлийн тэргүүн сарын шинийн 1-ний өдөр Монгол Улсын Ерөнхийлөгчийн гарын бэлэг өгнө.
• “Чингис хаан” одонгоор шагнагдсан Монгол Улсын иргэн нь Монгол Улсын Ерөнхийлөгчийн гадаад улсад хийх албан ёсны айлчлалын бүрэлдэхүүнд багтах эрхтэй гэж заажээ.