Иракийн Ерөнхий сайд Адель Абдель Махди Засгийн газрыг эсэргүүцсэн жагсаал болж буй Багдад хотын гудамжууд руу терроризмтой тэмцэх элит тусгай хүчнийхнийг илгээхийг тушаасан тухай “Reuters” агентлаг тус улсын хүчний байгууллагууд дахь эх сурвалжуудынхаа мэдээллээс иш татан уламжилжээ.
Тусгай агентлагийн мэдээлснээр, Иракийн тусгай хүчний командлагч жагсаалыг тараахад "шаардлагатай бүх арга хэмжээг авах" зааврыг Засгийн газрын тэргүүнээсээ хүлээн авсан байна.
Иргэдийн амьдрал доройтож, ажилгүйчүүдийн тоо нэмэгдэж буйг, түүнчлэн төрийн байгууллагууд дахь авлигыг эсэргүүцсэн жагсаал Иракт баасан гарагт эхэлжээ. Эсэргүүцлийн жагсаал маш хурдан үймээн самуун болж хувирсан байна. Эмх замбараагүй байдлын үеэр 42 хүн амиа алдаж, 2000 мянга орчим хүн гэмтжээ. Жагсагчид цагдаа нартай мөргөлдөж, орон нутгийн засаг захиргааны байрууд, янз бүрийн намуудын болон цэрэгжсэн шиит хөдөлгөөний /Аль-Хашд аль-Шааби/ байрууд руу дайрч, эвдэн сүйтгэх ажиллагаа явуулан, галдан шатаасан байна. Үүний улмаас Засгийн газрын 70 гаруй байр, намын төв байрууд, хувийн өмчүүдэд хохирол учирчээ.
