Италийн парламент парламентын доод болон дээд танхимын гишүүдийнхээ тоог цөөрүүлэх тухай хуулийн төсөл батлаад байна. Доод танхимын төлөөлөгчдийн тоог 630-аас 400, дээд танхим буюу Сенатчдын тоог 315-аас 200 болгон бууруулжээ.
Парламентын дээд болон доод танхимд эрс шинэчлэлт явуулах амлалт аваад байсан, Италийн хамтарсан засгийн газрын гол хүчин болох Таван Од намынхан амлалтандаа хүрч, тус улсын төлөөлөгчдийн танхмын гишүүд 230 суудлаар, Сенатын танхим 115 суудлаар цөөрөхөөр болоод байна.
Энэ өөрчлөлт нь төрийн зардлыг хэмнэхэд ихээхэн тус болно гэж үзэж байгаа юм. Таван од намаас твиттер хуудсандаа парламентын гишүүдийг тоог танах хуулийн төсөл хэрэгжиж эхэлснээр Итали улс ирэх 10 жилийн хугацаанд 1 тэрбум еврог хэмнэнэ гэж мэдэгдлээ. Парламентын нэг гишүүнд дунджаар 230 000 евро, сенатын нэг гишүүнд 249 600 еврог зарцуулдаг байна. Энэ шинэчлэлтээр парламентын доод танхимын гишүүдэд зарцуулж байгаа төсөв жилд 52 сая еврогоор багасах бол сенатын гишүүдэд зарцуулдаг мөнгө 28 сая еврогоор танагдах юм.
Хуулийн төсөл дараагийн сонгуулиас хойш буюу 2023 оноос хэрэгжиж эхэлнэ. Харин шүүмжлэгчид парламентын доод болон дээд танхимын гишүүдийн тоог эрс цөөрүүлж байгаа нь ардчиллыг сулруулж, лоббичидын төрийн өндөр албан тушаалтанд нөлөөлөх боломж нэмэгдэж байна хэмээн шүүмжилжээ.
