Өнгөрөгч даваа гаригт эхэлсэн ТЕГ-ын дарга асан Б.Хурцын шүүх хурлаас ч илүү дуулиантай хэргийг МАН-ын Засгийн газар өдүүллээ. Засгийн газар Өмнөговь аймгийн Гурвантэс сумын нутаг, Тост, Тосонбумбын ордод олборлолт явуулж байсан УИХ-ын гишүүн Б.Чойжилсүрэнгийн эзэмшлийн “Сауд Гоби коэл транс” ХХК-ийн тусай зөвшөөрлийг хурааж, үйл ажиллагааг нь зогсоов. Засгийн газраас уг шийдвэр гарсан дариуд мэргэжлийн хяналтынхан очиж нөхөн сэргээлтийн үүрэг даалгавар өгсөн байна. Өөрөөр хэлбэл, “энэ тоглоом биш шүү, жинхэнээсээ болж буй хэрэг” гэдгийг эрхэм гишүүнд сануулсан хэрэг л дээ.
Ашгүй муу, олигархийг. Алаад өг, нэмээд дэвс... Манай голоор нэг найр наадам. Ард нь “Сауд Гоби коэл транс”-ад ажиллаж байсан 400-гаад ажилчин ажилгүй болов, тэдний голоор нэг уйлаан майлаан. Өнөөдөр хөршийн чин амбаараас шуудайтай будааг нь хурааж авсан төр маргааш таны хүүхдийн аягатай хоолыг булаана гэдэг үгийг монголчууд санасангүй дээ.
“Сауд Гоби коэл транс” компани 2010 онд анх байгуулагдсан юм байна. 2011 онд “SGS” компаниас хайгуулын тусгай зөвшөөрөл худалдаж аваад хайгуулын ажлыг хийж эхэлсэн. 2018 оноос олборлолтын ажлыг эхлүүлсэн байдаг.
Харин энэ хооронд буюу 2015 онд олон улсын “TNC” байгууллагаас говьд хамгаалах шаардлагатай газруудыг судлан нэрлэж, энэ дагуу Засгийн газраас Тост, Тосон бумбын нурууг улсын тусгай хамгаалалтад авахад “Сауд Гоби коэл транс” компанийн лицензэт талбай хилийн гадна үлдсэн юм байна. Харин сая тус компанийн тусгай зөвшөөрлийг цуцалсны дараа Ерөнхий сайд У.Хүрэлсүх Тост, Тосонбумбын нурууг бүхэлд нь тусгай хамгаалалтад авснаа зарлалаа. Одоо Б.Чойжилсүрэн лицензийн талбайгаа улсын тусгай хэрэгцээнд өгснийхөө төлөө хуулийн дагуу Засгийн газраас нөхөн олговор шаардах л үлдлээ. Тэгнэ ч гэдгээ хэлсэн байна лээ. Үр дагавар нь хөөрхий, татвар төлөгчдийн нуруун дээр л буух нь дээ.
Б.Чойжилсүрэнг "Ардчилсан нийгэмд амьдарч байгаа" гэдгээ сануулсны дараа манай “Монгал ална”-чууд “Ардчиллын нэрийг барьдаг Ардын намын хулгайч юу вэ? Амьд үлдсэндээ баярла, муу ... минь” гэх мэтээр цахим орчинг эзэгнэж байна. Ардчилал даанч хэнийг ч ялгаварладаггүй л дээ. МАН байна уу, АН байна уу, бүр “Монгол ална”-чууд байсан ч ялгаагүй, Монгол Улсын иргэн бүр хуулийн хамгаалалтад багтдаг. Хуульд заасан үндэслэл, шалтгаангүйгээр хэний ч хөрөнгийг дайчлан хураадаггүй.
Хэрэв тэгсэн байж гэмээн хохирогч этгээд хуулийн дагуу шүүхэд гомдол гаргаж, хөндөгдсөн эрхээ сэргээлгэх эрхтэй. Ардчилсан нийгэмд төр, иргэн хоёр яг түвшинд оршдог. Төрийн дур зоргыг хязгаарлахын тулд гаргаж байгаа шийдвэр, хийж байгаа алхам бүр нь хуульд нийцэж, хуульд захирагдаж, хамгийн гол нь хүний төлөө байхыг сануулдаг. Мөн нийтийн эрх ашиг гэдгээр халхавчлан нэг хүний эрхийг зөрчихийг ч цээрлэдэг.
Б.ЗАЯА
