Өчигдөр УИХ-ын Аюулгүй байдал гадаад бодлогын байнгын хороо хаалттай хуралдав. Хуралдаанаар Гадаад хэргийн сайд Д.Цогтбаатарын мэдээллийг сонслоо. Хуралдааны дараа Байнгын хорооны дарга Т.Аюурсайхан “Сүүлийн арах гаруй жилд хар тамхины хэрэгт холбогдсон дипломатуудын талаар мэдээлэл сонслоо. Арга хэмжээ авахгүй бол болохгүй болсон байна. УИХ, ҮАБЗ-д танилцуулна” гэв.

Өнгөрөгч тавдугаар сард Туркийн Станбул хот дах манай Дипломат төлөөлөгчийн газрын Дэд консул нь жолоочийн хамт их хэмжээний (70 кг героин, гурван сая евро гэдэг тоглоом биш шүү дээ) хар тамхи тээвэрлэж яваад ХБНГУ-ын хууль хяналтын байгууллагынханд “гардуулсан” билээ. Хэрэг гарснаас хойш сарын дараа буюу зургадугаар сарын 3-ны өдөр ГХЯ хэргийн холбогдогчдын нэрийг нууцлан мэдээлэл хийсэн.

Олон нийт болон хэвлэл мэдээллийн хэрэгслүүд үүнийг “ГХЯ дипломат албан хаагчдын холбогдсон гэмт хэргийг нуун дарагдуулсан” хэмээн буруутгасан (үүнээс зургаан сарын өмнө нь мансууруулах үйлчилгээтэй эм, эмийн бэлдмэл хууль бусаар тээвэрлэж яваад саатуулагдсан Эрхүүгийн консулын талаар ч бас мэдээлээгүй өнгөрсөн) бөгөөд хариуд нь Д.Цогтбаатар сайд “1992 оноос хойш хар тамхи болон бусад гэмт хэрэгт холбогдсон дипломат албан хаагчдын талаар УИХ-д мэдээлэл хийнэ” гэсэн билээ. "Би үхэхээр чи үх, ганцаараа үхэхээр олуулаа үх" болсон хэрэг. 

Тэр тусмаа “Өнгөрсөн оны сүүлчээс энэ талаар мэдээлэл аваад Европын улсуудтай хамтарч ажилласны үр дүнд хэргийг илрүүлсэн” гэх Гадаад хэргийн сайдын мэдэгдэл ("Үндэсний шуудан" сонинд өгсөн ярилцлага) бүр ч их анхаарал татна. Монгол Улс хар тамхины улс дамнасан сүлжээнд нэгэнт оржээ, түүнийг илрүүлэхийн тулд Гадаад хэргийн сайд нь гаднын тусгай алба, хууль хяналтынхантай хамтарч ажиллажээ гэж ойлгохоор байлаа. 

Үнэндээ бол Гадаад хэргийн яамны Консулын газрын дарга “Хувь хүний нууцтай холбоотой тул хэргийг шалгаж дуустал нэрийг нь нууцлана” хэмээн мэдэгдсэний маргааш ТЕГ-ын Тамгын дарга Э.Эрдэнэ дахин нэг "сюрприз" барьсан нь хэргийн холбогдогчдын нэр усыг зарлаад зогсохгүй “Б.Баттүшиг нь манайд ажиллаж байсан. ГХЯ-ны шугамаар хоёр ч удаа үүрэг гүйцэтгэсэн” хэмээн зарласан билээ. Ингээд Дэд консулыг буруутгаж байгаа “хар тамхи тээвэрлэсэн” хэрэг дээр “тагнуул хийсэн” хэрэг нэмэгдэх нь тэр. Дэд консулаар томилсон нь халхавч байжээ гэсэн үг. 

Тагнуулчдаа барьж өгдөг тагнуулын дарга ганц манайд л байдаг. Өөрийн улсын иргэнийг гадаад улсын шорон луу өөрийн санаачилгаар илгээдэг Гадаад хэргийн сайд ч гэсэн манайд л байна. "ХБНГУ-тэй эрх зүйн туслалцаа үзүүлэх гэрээгүй учраас тус улсын хуулиар хэргийг шийдвэрлэнэ" гэх арынх нь тайлбар бүр ч гаажтай. Хэрэг үйлдэхээс нь өмнө дуудаж авчираад өөрийн улсын хуулиар шийдвэрлэж болохгүй байсан хэрэг үү? Ингэхэд энэ хоёр хүн аль улсад хүчин зүтгээд байна аа. 

Б.СЭМҮҮН